Due brocche de viovetta/O Conseggê

Da Wikivivàgna
Due brocche de viovetta de Carlo Malinverni
O Conseggê
ed. www.liberliber.it 2010
[p. 38 modifica]
O Conseggê


Cöse ghe vêu – sentimmo –
pe fâ ûn bon conseggê? –
Comme mi, quando rimmo,
conto s'en giûsti i pê,
contemmole in scë die
e bonn-e qualitæ…..
sensa queste o fa rie
(o cianze ?) i amministræ.

Onesto scinn-a a-o scrupolo
dev'ëse, sorva a tûtto,
chi va a Palassio Tûrsci;
no aveì o panê brûtto;
no ëse, ûnn-a testa vêua;
no ëse comme a castagna
ch'a l'é bella de fêua
e drento a l'ha a magagna:

bezêugna poi ch'o sacce
l'impegno ch'o l'assûmme:
ch'o no l'agge due facce,
comme l'é ûn pö o costûmme.
(Giano o l'insegna troppo
a-i fanæ stando in çimma)

[p. 39 modifica]

e che o mantegne doppo
quanto o l'ha dito primma:

o no dev'ëse, insomma,
ûn ghindao, ûnn-a ventoela,
ûnn-a balla de gomma,
o ûnn-a brûtta çeniëla
sensa voxe in capitolo,
o ûn bûrattin chi gîa
testa, moen, gambe…. eccetera
segondo Zane o tîa:

no fa bezêugno ûnn'aquila
pe amministrane ben;
e manco voemmo i soliti....
– comme dî? – ciarlatten
(o resto ö canta l'organo)
ch'en solamente boîn
a fâ d'ogni erba fascio,
e tiâ l'ægua a-o sò moîn:

figgio do nostro secolo
o deve capî l'öa,
e che pe çerti articoli
semmo con l'ægua ä göa;
capî che e vegie raccole
han fæto a raxa e a muffa....
se no, ch'o vadde a cuccio,
o ch'o camalle a cuffa:

[p. 40 modifica]


ûnn'onça de bon senso,
vegnûo dä vitta pratica,
a va, mi aomeno penso,
ciù che tanta grammatica;
azzunzighe due gramme
d'amô pe-o nostro nïo….
remescia tûtto, e damme
ûn conseggê d'asbrïo! –