Due brocche de viovetta/A nêutte de Natale
| ←In sciö fâ da seja | Due brocche de viovetta de A nêutte de Natale |
O giorno de Natale→ |
| ed. www.liberliber.it 2010 |
(I SPEGASSO)
In casa no gh'é ûn can; – tûtti pe-a stradda:
ommi, donne e figgiêu, vegi e zoenotti,
tûtti a rëo, son de fêua pe fâ caladda:
in casa, no ghe resta che i marotti.
S'arrûxenta in te béttoe di gren gotti:
a röba in te bûtteghe ä dan de badda?
Tûtti han pë moen di gruppi e di fangotti....
Cöse arriva? – a tempesta con l'aggiadda?
Ninte! – o l'é ûn sciammo de battuzi con
coerci, scigoeli, sûnaggin, chitäre....
Basta fâ ramaddan, tûtto l'é bon!
Ciarlatten, repessin, negiæ, fanfare,
diai, malanni pe-e ciasse – ûn preboggion,
libbri, öfêuggio – so mi!? – strasse, fucciare!...