Due brocche de viovetta/A ûnn-a toâ d'amixi
| ←Brrr... che freido! | Due brocche de viovetta de A ûnn-a toâ d'amixi |
A-o fâ do giorno→ |
| ed. www.liberliber.it 2010 |
Sento dî che l'etichetta
a l'ha i brindixi sbandîo:
che a ûnn-a töa che se rispætta
fâ di versci l'é proibîo,
l'é proibîo fâ da caladda
comme fa a gente de stradda.
Sento dî tante atre cöse
che me tocco se ghe son:
stæmo lì co-e lærfe imböse
a fâ dunque a digestion?
pe no paeì tanti deslögi
stæmo lì comme bacögi?
E dî ûn pö, se, (Dio no vêugge!)
ne-a combricola gh'é ûn poeta?
Meschinetto! de recchêugge
due cioccate lê o s'aspëta.
E o l'aspëta a balla a-o botto
co anscietæ, pe andâghe sotto.
Çerte regole farçie
no son pan pe-i nostri denti:
semmo chì pe mangiâ e rîe,
pe vortâse a tûtti i venti,
comme voemmo, sensa gena,
comme han fæto sempre a Zena.
Mi zeneize risoræo,
ammo in tûtto a libertæ;
diggo forte e diggo ciæo
che a-o vestî de societæ
preferiscio ûnn-a cacciêuja,
comme a-a buzza l'ûga mêuja.
Mentre c'ûnn-a gran bazinn-a,
camminavo a-o Rasccianin,
di ûn pö voî chi s'avvixinn-a,
proprio zù in to caroggin?....
A mæ mûsa portoliann-a,
gianca e rossa, fresca e sann-a.
Legia comme ûnn-a cardænn-a,
tùtto o giorno a va in giandon,
aoa a-o Mêu, ciù tardi ä Maenn-a
sempre in çerchia da canson;
lê a me mette – oh! che contaggio –
in te moen questo sûnaggio.
L'é pe lê, pe sta battuza,
che pe-o primmo rompo o giasso:
no-a veddeì, perché a sta ascöza:
a tia o sascio e a sconde o brasso;
a l'é lê ch'a fæto l'êuvo,
e son mi che canto e.... schêuvo.
A l'é stæta ûnn-a pensata
a segonda fâ de cangio,
e a meitieiva ûnn-a cioccata:
zà, mi quande beivo e mangio
con di amixi.... che disastro!
a se m'arve sensa inciastro.
Lasciæ dî che a l'é tûtt'ûnn-a,
tanto semmo in Carlevâ
acciappemmo sta fortûnn-a,
no se stemmo a ammagonâ,
d'ëse in tanti vegi amixi,
mëzi calvi e mëzi grixi.
Beivo dunque e invito a beive
tûtti quanti a l'amistæ:
Sentî? fêua ghe sa de neive,
chì, a redosso, pe chi ha sæ
gh'é do döçe e de l'amäo,
tûtto vin che dà l'aväo.
Beivo torna.... e a beive invito…..
tûtti, sciù! c'ûn bello: evviva!
chì, bottigge e gotti, fïto....
piggia lampo a comitiva....
e mi täxo perché sento
che a pä a föa zà do Bestento!