Donaver Antologia 1910/L'ommo allegro
| ←torna a lista di atri scriti | L'ommo allegro de da l'Antologia do Donaver do 1910 |
torna a l'endexo→ |
L’ommo allegro, lettoî cai,
Sempre staeto a mae pascion,
Ve-o presento in mëzo a-i guai
De sto mondo brontolon
Tanto che ö possae abbrassâ,
E invitâvelo a disnâ.
2
L’ommo allegro o l’è a demöa
De qualunque l’avvixinn-a
Sae in salotto co-a scignöa,
Sae co-a serva o stà in cuxinn-a;
— Lê filosofo in te tûtto,
Göde o bello e göde o brûtto.
3
L’ommo allegro, in sciö violin,
S’o ghe capita in te moen,
V’improvvisa a Gigoggin.
V’improvvisa o Grettechen;
I Pappae, ë Mammae se sciallan,
E i zoenotti in gïo ghe ballan!
4
Co-a chittara poi se mette
L’ommo allegro a improvvisâ,
E o v’attrêuva e cansonette
Che ve fan desganasciâ;
Trêuva l’arte do fa rïe
Finn-a i vëgi, ë gente pïe!
5
Canta l’aja e a serenata
De l’amante appascionôu;
Ve condisce a campagnata
Co-a bûrletta in sciö stûffôu;
Co-i figgêu de lungo addosso,
Treppa e balla a ciù no posso.
6
L’ommo allegro a testa a testa
Co-a scignöa in to salottin,
No ghe mette o chêu in tempesta
Con discorsci libertin,
Ma o ten vivo a compagnïa
Con galante giromïa
Senza aççende de gioxïa.
7
L’ommo allegro misso a töa,
Serve poi de paragon
Tra o bûffon che s’impe a göa,
E o scimpatico bûrlon;
Perchè o primmo o mangia ben
E o secondo allegri o ten.
8
Quando o vin se versa in gïo,
L’ommo imbriaego o stà assettôu;
Questo invece pin de brio
Trêuva o brindixi addattôu,
Parla a tûtti — e tûtti van
Fêua de lô cö gotto in man!
9
Cai Zeneixi, in mae zûamento,
Con de sti ommi a-o mondo ancon,
Ve sò dîve che me pento
D’ëso röuzo e brontolon;
— Vêuggio mettime a cangiâ
Mi ascì moddo de pensâ! —
10
Ma cö patto a dî a veitae
Che ascì cangie a Societae....
— E ho speranza che cangiëmo,
Che a sto punto ghe vegniëmo,
Quand’aviemo ûn po ciù paxe,
E ûn po meno o chêu in te braxe! —
Coscì fosse! Cosci scïa!
— Viva dunque l’allegrïa!