De Franchi Comeddie 1781/Ra locandera de Sampê d'Areña/3
| ←Scena II | Ra locandera de Sampê d'Areña de Scena III |
Scena IV→ |
| a m co-a tirde a l'é stæta reiza co-a doggia m (mm) |
Ghiggiermo, e Zanettin, che parla da Villano.
Zan. E ghe façço reenenzia, sciô Patron.
Ghig. Addio, Zanettin. Cose gh’è de nœuvo? comme vala[?] in che stato è a campagna?
Zan. Eeh, caro sciô Ghiggærmo, coscì, coscì. Bezœugna stâ a eì; e nò se pœu dî gatto fin ch'o no seglie in tro sacco.
Ghig. Bravissimo, Zanettin. ti parli sempre da oracolo. Voî atri manenti ve doveresci ciamâ mai ninte: perchè d’Arvî e de Mazzo i patroin son sempre ricchi. Sciô patron, che bella campagna.. gh’è de tutto. tutto mostra ben. un’anâ che non se n’è mai visto da tempo in çà. Do meize de Settembre, e d’Ottobre semmo in roviña.. A tempesta, a gragnœura, o coin, o vento, l’ægua, o malanno chi v’accœuggie, non ghe[sic] ciù tant’osso da fâ un dæ. Manenti! manenti.. Mai ninte, mai ninte.. E ville son e vostre.
Zan. Sciô patron, mi non ghe n’hò courpa. Tutto ven de lasciusa, e pigliemmo quello chi ven. Ma descorimmo un pô de cose allegre. sciô patron, scuzæme se me façço troppo inanti, e se son odaçioso: me pâ che andæ strenzendo l’ameçizia con a sciâ Argentiña a patroña da Locandria. Nè ve meteresci miga a reizego de fave sunâ e tenebre? vidoo con vidoa, o saræ un diertimento do exinato.
Ghig. Zanettin, ti te piggi troppa libertæ. Ma un servitô antigo de caza comme tì, non se ghe deve tegnî ninte de segretto, e coscì te façço a confidenza, che hò concluso de mariame con Argentiña, da ultimase ciù presto che sarà possibile.
Zan. E cose ve penzævo de fâ de ostra figlia a sciâ Ottaietta? foscia, che a stesse sotta i andamenri da sciâ Argentiña, ch’a ghe comandasse a bachetta? a ne saræ migha uña cuosa, chi anasse a camin, sciô Ghiggærmo.
Ghig. Voî atri vilen soleì dî, che con o tempo e a paggia mœuran e nespore. Ho zà pensaò a tutto; e ti devi saveì, che hò zà concluso, e sô nozze con o sciô Tiritoffolo, figgio do sciô Giangorgolo Magagnan de Borzonasca Borgheize di ciù mosci de quello paize, e chi hà tanta tæra a o sô per uña partia de conseguenza, dinæ, gioje, mobili, argenti, e quello che ciù importa, industrioso, da fâ dinæ sciù un scœuggio. E tanto l'un comme l'atro matrimonio, penso de terminari in o mæximo giorno. Mì vaggo fin a Zena. tì fermate a dâ un poco de recatto a quello chi fâ de bezœugno. Addio. (parte)