Ciaravalle 1833/Rimedio pe-o mâ da Pria

by Martin Piaggio

←Inconvenienza pe-a Sumegianza

Ciaravalle zeneize pe l'anno 1833 de Martin Piaggio Rimedio pe-o mâ da Pria

L'ôa de Disnâ→

Rimedio pe-o mâ da Pria

Un giorno gh’ea un Villan,
Chi aveiva o mâ da pria,
E un Mego ghe dixeiva
De fâghelo andâ via;

Ma o l’ea de quelli Meghi
Antighi, che meschin
Ve spûan sempre sentenze
E reggittan latin;

Ogni giorno o ghe dava
Rimedj differenti,
Decotti, pilloe, bibbite,
Inciastri, seotti, unguenti;

Ma quello poveo diavo
Con ciù cose o piggiava
Sempre ciù o mâ o sentiva
Nè pê, nè gamba o fava;

Un giorno o s’adesciò
Co-e gambe, e tutte e die
Di pê, pin-ne de doî,
E meze arrensenie.

A l'è podraga! o criò;
Capita o Mego.... ebben ?
Come se stà?, o ghe dixe,
E lê,, pezo.... Và ben!

Se gh’è azzunto a podagra!
Scialla! (o risponde dûo)
Gutta cavat lapidem;
Seì guajo de segûo.