Ciaravalle 1833/A Torta Pasqualin-na

Da Wikivivàgna
Ciaravalle zeneize pe l'anno 1833 de Giulio Bosco
A Torta Pasqualin-na
Zena, Stampaja Pellas, Ciaçça Banchi n. 576 - exemprâ conservao inta Libraja pubbrica de Niorche


[p. 71 modifica]

A Torta Pasqualin-na.


SUNETTO.


Beneita mille votte, e beneixia
E benedetta quella magnettin-na,
Chi sà fâ un-na Tortetta pasqualin-na,
E ve-a presenta cäda, e brustolìa;

Beneito sæ quell’êuggio chi l’ammïa,
E quell’odô ch’a manda da vixin-na,
L’erbetta, o cuccon fresco de pollin-na
E quella prescinsêua chi scappa via;

Beneita seggie a meizua cö canello,
O siasso, e a faæn-na chi se lascia tiâ,
E l’êujo chi ven zù comme un spisciuello;

Beneito seggie o forno cö fornâ;
O testo, o tondo, a ciumma cö cotello,
E quella bocca chi ne pêu mangiâ.