Chittarin zeneize 1881/495 Sunetto

by Martin Piaggio

←Congê

Chittarin zeneize de Martin Piaggio Sunetto - a-o Gaitan Crivello

Sunetto→

a-o tenô Gaitan Crivello pi-a so benefiçiata a-o tiatro da sant'Aostin ne-o carlevâ do 1826

SÛNETTO ¹

Questo ch’o l'é ûn tenô finn-a doman
Co-i mostasci davveì, de stampa antiga!
Grande attô e professô de primma riga,
Da dâghe a drïta e da baxâghe a man!

Che vaddan da lê ä schêua quelli che san
Pe imprende ûn pö a cantâ sensa fadiga;
Perché ûn ätro Crivelli non gh'è miga
A-o mondo, e ûn comme lê quando o sentiän?

Che bella voxe o l'ha! Che bella azion!
Che forsa de cantâ! Che agilitæ!
Aoa o pä ûn zeffiretto, aoa o l'é ûn tron.

Boemondo ² se pêu fâ con ciù veitæ?
Se pêu inspirâ ciù raggia e ciù magon?³
O fa fin mescià^[sic] i morti, in me veitæ!