Chittarin zeneize 1881/489 Sunetto

by Martin Piaggio

←Sunetto

Chittarin zeneize de Martin Piaggio Sunetto - a-a Carlotta Marchioña

Congedo→

a l'attriçe Carlotta Marchioña pe 'na so benefiçiata a-o tiatro da sant'Aostin inte l'aotunno do 1823

SÛNETTO ¹

Me paeivan cöse troppo esageræ
Quelle di greci e di romani autoî
Quando descrivan tanta abilitæ
De çerti antighi sò declamatoî;

Ma aoa che sento e ammïo co-i êuggi mæ
Ûnn-a Marchioni reçitâ da noî,
Me e creddo e diggo ch’a i ha sûperæ,
E fra i moderni a n’ha competitoî.

Tûtto in lê se riûnisce, arte, natûa,
Grazia, genio, virtù, voxe, maestria,
Elegansa, contegno, precisûa.

De Melpomene figgia o de Talìa,
Spicca cianzendo o riendo a sò bravûa:
Attrice no gh’è a-o mondo ciù finïa!