Chittarin zeneize 1881/441 Per onomastico

by Martin Piaggio

←Sunetto

Chittarin zeneize de Martin Piaggio Per onomastico - a præ Antogno R.

Sunetto→

scrita pe-o Giullio Rosacuta

PER ONOMASTICO ¹

Don Antonio stimatiscimo,
Sacerdote pregiatiscimo,
Me patron sempre cariscimo,

Ûn só amigo e servitô
D’offerîghe ha anchôu l’önô
Questi pochi fiorettin
Che o piggiò ² ne-o sò giardin
A-o spunta de quell’arbô
Chi fé nasce o fortunôu
E da tûtti festezzôu
Onomastico sò giorno.

Che scià o posse, de chêu gh’aùguro,
Vedde a Zena de ritorno
In salûte ancon pe ûn secolo,
Prosperoso in paxe e giûbbilo,
Di sò amixi in compagnia:
Che Dio vêugge e coscì scia!

Don Antonio, scià gradisce
Questi mæ fiori d’affetto,
E in to mëzo do massetto
O mæ nomme scià scolpisce,
Ché mi o sò l’ho in chêu presente,
E ghe o tegniö eternamente.

Sant'Antonio ö custodiä,
Sempre san ö conserviä
E i mæ voti ö l'exaudiä.
Scià me stagghe d’allegrïa
Che ghe fasso ûn bell’inchin.
Ghe son servo... Scignoria!

Rosacûta olim Giûlin.