Chittarin zeneize 1881/385 Sunetto

Da Wikivivàgna
Chittarin zeneize de Martin Piaggio
Sunetto - a-o N. N. dito Novaro


[p. 385 modifica]

SÛNETTO 1



Bravo! sciô Novarin, ti ê ûn gran pittô:
Ti hæ dipinto ûn paisaggìo chi è ûn portento!
Dove ti hæ mai pescôu tanto talento
Per fâ questa pittûa chi fa fûrò?[sic]

Ti g’hæ ciù grazia ancon che a fâ l'amô!
Sfiddo a fâne ûnn’eguale ciù de çento.
O pûbblico o stordisce e, in mæ zûamento!
I pittoî cianzan tûtti da-o brûxô.2

Che gûsto d’invenzion, che bon pennello!
Che finessa de tinte e che veitæ!
Ghe manca solo in ti erboi qualche öxello.

Ommi zà no ghe n’é, per brevitæ,
Gh’é appenn-a sorve o quaddro ûn aze bello
Chi vä solo da lê tûtti i dinæ.


[p. 386 modifica]