Chittarin zeneize 1881/37

by Martin Piaggio

←Scherço

Chittarin zeneize de Martin Piaggio Sunetto - Pe 'na patta in tæra

Sunetto→

SÛNETTO ¹

Oh che patta da bestie ho mai piggiôu!
Oh che dô che ho sentïo, poveo Martin!
Ohimemì! che son tûtto dezossôu ²,
Non posso stâ né in fianco, né survin!...

Sciorto o teatro per fâ ûn pö de piscin,
Nevava e tiava ûn vento indiavolôu,
M’arrembo despuntandome i cäsoin,
Tûtt’assemme me sento scappellôu.³

Me vòrto e veddo in tæra o mæ cappello
Corrî comme ûnn-a balla de cannon,
Te meo metto a scorrî comme ûn öxello;

Fasso treì passi, gh’ëa do giasso..... pon!
Scûggio che ciù ûn pittin m’arvo o çervello...
L’é ûn miäcoo do Segnô se vivo ancon.