Chittarin zeneize 1881/309 Congratulaçion

by Martin Piaggio

←Brindixi

Chittarin zeneize de Martin Piaggio Congratulaçion - a-o meistro Granæa

Sunetto→

i figgi de l'aotô, Maja, Anna e Michê a-o so meistro doppo o sucesso de l'oppia Elisa di Montaltieri

CONGRATULAZION ¹

Se é permisso a di scoläi
A-o sò meistro affezionæ,
Quanto questi a lê son cäi,
De poeì scrive ûnn-a veitæ
In vernacolo linguaggio,
Marinetta e Michê Piaggio
Con Ninnetta, tûtti treì,
Sensa fâ tanta gazzæa,
Se rallegran, sciô Granæa,
In due paole e con piaxeì,
Da sò bella e sorprendente
Prodûzion ch’incanta a gente

E che a fa tanto fûrô
Quanto a fa a vosciâ d'önô
Pe-e bellesse che gh’è drento,
Genio, gûsto e sentimento,
E pe-e magiche armonie
Nêuve affæto, e melodie
Che van proprio drïte a-o chêu,
E resciste no se poêu^[sic]
De sbraggiâ: Viva Granæa!
Bravo meistro!... e fâ bombæa ²
Da so Elisa fortûnâ,
Zà dä fâma trasportâ
Da per tûtto, con raxon,
Per fâ a sò ripûtazion.

Meistro cäo, scià compatisce
Questi versci da figgiêu,
Scià i aççætte e scià i gradisce
Perchè son partii da-o chêu,
Comme in atto de doveì,
Comme in segno de piaxeì,
Pe-a gran stimma che gh’avemmo
E l'amô che ghe portemmo.

Ma ne-i trionfi meritæ,
Fra i applausi prodighæ

A vosciâ comme a noî cäi,
Scià no scorde i sò scoläi
Marinetta, Michelin
E a strofoggio de Ninin.