Cava in to remoin 1930/ZÛGNO

In to remoin de Gioxeppe Cava
Zûgno

Cominsa cädo a fâ e e zôvenette
se vestan zâ de sgarza traforâ,
e a veddile ve pan de farfallette
attiae da-o lûmme che e dovià strinâ.

Atro che lûmme! Se ne schissan l'êuggio
restemmo a-o visco comme ciattaroïn;
s'insciamma ö chêu, va in fûmme ö portafeuggio,
e femmo de figûe da Benardoïn.

O gh'é chi sbraggia forte a l'indecensa
veddendo tanta grazia esposta a-o sô;
so' e brûtte e i mâ forgiae che – in confidenza –
ricoran pe-a bellessa da-o sartô.

A donna no l'é vëo che p'ëse onesta
a deve passâ a vitta in ta fasciêua;
ah, quante moraliste faiaen festa
s'ûn dio de pelle poesan mette in fêua!