Cava in to remoin 1930/TRAMONTI
| ←Mattin | In to remoin de Tramonti |
Seia→ |
TRAMONTI
Ö sô verso ponente, adaxo adaxo,
se ne và in mezo a nûvie d'öu lûxente[1]
e aççeizo da-o splendô de questo baxo[2]
ö carmo mâ semeggia ûn lago ardente.
A lenti ciocchi ûn campanin d'in Paxo
annunzïa a fin de ûn essere vivente,
comme se a cianze insemme ö triste caxo
invite co-a preghea l'ûmana gente.
Dui tramonti! Un fra e lagrime e ö dolore
de povia gente da-o destin provae,
che vêuan co-a forsa immensa de l'amöre
contende a-a neigra morte ûn figgio o ûn pòae;
l'âtro in t'ûn çercio aççeizo de splendore
scimile a-a gloria de l'Eternitae!