Cava in to remoin 1930/SEIA DE ZENÂ

by Gioxeppe Cava

←L'inverno grammo

In to remoin de Gioxeppe Cava Seia de Zenâ

Ö sôlleon→

SEIA DE ZENÂ

I

Sta seia fa freido
(o schissa Zenâ!),
intorno a-e fontann-e
gh'é l'aegua giassâ.
A gente a camminn-a
co-e man in ta stacca
e a testa in to baveo
ben fonda a l'insacca.
Chi svorta, chi taggia
de sbièscio e contrae;^[1]
e ciappe resêunnan^[2]
de passi aspresciae.^[3]
Gh'é solo e pattûgge
che van cadensae!

II

Se sente pe l'aïa
'na chêutta de neive:^[4]
da i osti se canta,
se zeuga, se beive.
Cö gotto davanti,
vixin a-o tanon,^[5]
ö freido o se sfidda,
se scaccia ö magon.^[6]
Chi é solo o l'aspeta
e ciave in ta schenn-a,^[7]
ma in stradda o repiggia
de nêuvo a sêu penn-a.
E in chêu o se gh'affonda
ciû tanto a scävenn-a!^[8]

III

Da e tore i relêuii
rebattan dozz'ôe;
ö vento co-a neive
combinn-a demôe.^[9]
E stradde o l'ingianca,
recamma i barcoin;
de xêui de farfalle^[10]
circonda i lampioin.
Se treppa scigôando,^[11]
se treppa de chêu:
che allegre battagge
doman tra i figgiêu!
Feliçe chi attrêuva
zâ cädi i lenzêu!

1. De sbièscio: di sbieco, diagonalmente. In genovese: de sbiascio.
2. Ciappe: lastre del marciapiede.
3. Aspresciae: apprestarsi.
4. 'Na chêutta de neive: una abbondante nevicata.
5. Tanon: caldano.
6. Magon: travaglio d'animo.
7. E ciave in ta schenn-a: modo popolare per indicare la chiusura del negozio.
8. Scävenn-a: sverza, scheggia di legno che si confica nello spessore della
   pelle e produce forte dolore.
9. Demòe: givochi.
10. Xêui: voli.
11. Scigoando: fischiando.