Cava in to remoin 1930/PREGHËA A-A LÛNN-A

by Gioxeppe Cava

←Giornâ de Sô

In to remoin de Gioxeppe Cava Preghëa a-a Lûnn-a

Madrigale→

PREGHËA A-A LÛNN-A

Pe piaxeî, ti me sae dî,
bella lûnn-a, che ti vae
curiosando pe-e contrae
comme ûn gardetto,^[1]
se l'é addescia e pensa a mî
a brûnetta dö mae chêu?
Per tî a nêutte, se ti vêu,
no l'ha ûn segretto.

E, se a dorme, a sêunna ancon
i baxin scangiae pe-a scâ?^[2]
De vôreime ûn pö informâ
o te rincresce?
In to cäxo, fa attenzion,
accostandote, d'ammiâ
che a têu lûxe inargentâ
no me l'addesce.^[3]

Bella lûnn-a, no stâ a fâ
quella faccia da maschae...^[4]
Ti ghe vae o ti no ghe vae
da-a mae zeneize?
Sciû, no fâme ciû söspiâ!...
Tî che a tûtti ciaeo ti fae,
Paraninfa di innamoae,
seggi corteize!^[5]

1. Gardetto: garzoncello.
2. Scangiae: scambiatisi.
3. Addesce: svegli.
4. Maschae: schiaffi.
5. Seggi: sii tu.