Cava in to remoin 1930/NECRÖLOGIO

by Gioxeppe Cava

←Gazzo o lûxe elettrica?

In to remoin de Gioxeppe Cava Necrölogio

A-i trêuggi→

NECRÖLOGIO

«Ma cosa sciâ me dixe, a sciâ Lûçia^[1]
l'é morta ö giorno dui? Cäa sciâ Lazzaea,
l'ho vista tempo fà in Sant'Andrïa
insemme co-a Manin da bûtteghaea.

A l'ëa robûsta ancon, e regaggïa^[2]
e no me siae creddûa con quella cëa...^[3]
Sesciant'anni d'etae? I 'na môuttïa^[4]
de chinze giorni solo?... Comme a Bèa!...

'Na fin, davei, coscí no s'a meitava.
Quanti morti, Madonna, quest'inverno!...
Preghiò ö Segnô per le, l'ëa tanto brava,

che se a ciammiä vixin in sempiterno!...
Sescianta, chinze, dui, no ghe pensava,
gh'é ö lotto proprio chì; me zêugo ûn terno!...».

1. Lûçia: Lucia.
2. Regaggïa: rigogliosa.
3. Cëa: aspetto, cera.
4. Môuttïa: malattia.