Cava in to remoin 1930/MARSO
| ←Frevâ | In to remoin de Marso |
Arvî→ |
MARSO
No sò perchè cominse a Primmaveïa
proprio 'sto meize tanto aççidentôu,
ch'o cangia e carte in töa da l'arba a seia
e o pä ûn cavallo intrego desbrillôu.
Un giorno pin de sô o te fà fèsta,
e persighe e i amandoe o fà scïoî,
ûn âtro caccia zû vento e tempesta
e no permette quaexi de sciortî.
L'é ûn meize çervellin, ûn gran stondaïo,
che no se sà mai comme poeî piggiâ;
ûn meize da scassâ da-o calendaïo
in punizion dö sêu moddo de fâ.
Cominsa a Primmaveia e tutti quanti
se puntan finn-a a-o collo ö cappotton;
ritorna e rondaninn-e cu-i cûgianchi
e a neive a ven de nêuvo de staggion!...