FREVÂ
Fortûnn-a che Frevâ o l'ha de meno
di giorni da campâ di ûnze frae,
ma bastan pe i seguaci de Galeno
a fâ di buin affari co i speziae.[1]
Cattari, cattaretti, pulmonite,
influenze, spagnolle e congestioïn,
pe 'sti scignori son tante pepite
scoverte in te caverne di pulmoïn.
Pe diversivo a tûtti 'sti malanni
gh'é e vëggie con i balli mascherae
dove se fâ da scemmi tûtti i anni
cö benefizio ascî da caritae.
Se pecca, oh se se pecca! in te 'sto meize
e se pecca con gûsto e con paxion;
'sta Quaexima, mae cäi, paghiemo e speize
e ö praeve o ne daiä l'assoluzion.
MARSO
No sò perchè cominse a Primmaveïa
proprio 'sto meize tanto aççidentôu,
ch'o cangia e carte in töa da l'arba a seia
e o pä ûn cavallo intrego desbrillôu.
- ↑ Speziae: farmacisti.