Cava in to remoin 1930/A GREPPIA
| ←Pasqua | In to remoin de A greppia |
Conseggi pe ben vive→ |
A GREPPIA
Bambin bello, bambin cao,
de pellame gianco e fin,
tî t'ë nato in te 'na stalla
comme ûn misero meschìn.
Bonn-a donna no ghe n'ëa
per asciste tò mammà
e poei dî con bella cëa
– S'assemeggia a sò papà! –
O gh'êa un âze ûn po' buscetto,
con ûn bêu magro e cornûo,
che a sò moddo, povie bestie,
l'ha criou un: Benvegnûo!
San Gioxeppe o no l'aveiva
de pataeli e o t'ha possou
in ta greppia – ciû o no poeiva –
poiché o l'ëa ben ben despiou.
Con ö tempo quella greppia
l'é vegnûa scì venerà
che se un ommo o se ghe attacca
no ghe o poei ciû destaccâ
Co-e cadenn-e o se ghe liga
perché o sa da bon cristian:
– Chi l'é a greppia o no fatiga
né ghe manca onori e pan –.
L'âze e ö bêu, ste povie bestie,
che t'han daeto a greppia e ö sciou,
n'han avûo, pe recompensa,
ûn fî d'erba rezuggiou.
L'âze e botte ciû o no conta,
beive l'aegua e porta ö vin;
sotta ö zu poi l'atro o sconta
d'ëse staeto ö tò paddrin.
Natale 1934.