Cava in to remoin 1930/A BALENN-A
| ←Miss globe-trotter | In to remoin de A balenn-a |
Feliçitae→ |
A BALENN-A
A sciâ Marinn-a a l'é 'na donna santa,
pacifica e tranquilla a tutt'andâ;
a ingrascia a vista d'êuggio e a se ne vanta
benché a no posse quaexi camminâ.
S'a chinn-a in to giardin a se gh'accianta
e a sûa d'in taera i pë pe destaccâ;
quanto o ghe ven in man a se gh'agguanta
pe pôei de nêuvo in casa ritornâ.
Se a passeggia pe-a casa ö terramotto
se descadenn-a e tûtto a fâ ballâ,
eppûre a no s'accorze d'ëse ûn motto
de carne da portâse a-o maxellâ.
A mangia tûtto ö giorno e a s'impe ö gotto
pe pôei razzunze presto a tonnellâ.