Cava in to remoin 1930/A ÛN VËGIO PIN SOLITAÏO
| ←Seiann-a traditöa | In to remoin de A ûn vëgio pin solitaïo |
L'inferno→ |
A ÛN VËGIO PIN SOLITAÏO
O Pin, da-e fêugge agûsse comme agôgge[1]
ciantae in te ramme têu nodöse e storte,
no gh'é sciûsciâ de venti chi te dôgge[2]
e ö mâ co-e sêu sprûinae te fa ciû forte.[3]
In mëzo a-o çê turchin ö verde paegua[4]
t'arvi maestoso e pä che ti te vanti
de prosperâ robûsto döve l'aegua
i freschi ûmôî ghe nega e i verdi incanti.
Sarvaego ti ë cresciûo in sce ûnn'artûa[5]
a picco sörva ö mâ che a morde e a baxa,
sensa a gioia de sciôî, ma da-a natûa[6]
t'ae avûo in compenso ö barsamo da raxa[7]
da-o tronco destillâ, impindo l'aïa
d'ûn san profûmmo acûto, deliziöso,
che mesccio cö marin. che ven da-a baia[8]
ö pëto fa respiâ ciû vigoröso.
Me piaxe a l'ombra têu de quando in quando
vegnime a repösâ beato e sölo,
restando a lungo chi fantasticando
co-a mente desbrillâ, e me consölo
a contempla 'sto mâ, 'ste belle rive,
'sto çê coscì seren ch'o rïe contento
de fäla in barba a quanti o vêuan descrive
e a carta ghe remettan cö talento.