Cava in to remoin 1930/Ö LÛTTO PE-O MAÏO
| ←A scoverta de Voronoff | In to remoin de Ö lûtto pe-o maïo |
A môae severa→ |
Ö LÛTTO PE-O MAÏO
– Ghe fasso e condoglianze, sciâ Manena,
pe-a gran disgrazia che gh'é capitâ...
Un pö in ritardo, scî; son staeta a Zena
diversci meixi in casa de mammâ.
Sciâ se fasse dö chêu, sciâ l'é ancon zôena,
ben missa e fresca, sciâ se consolià...
D'altronde, cose fâ, cäa sciâ Manena,...
i morti no se pêuan resûscitâ.
Sciâ ghe voreiva ben, povôu Tomaxo,
e sciâ l'aviä segûo sempre in to chêu;
ma, diggo, sciâ sà ben, de votte ö cäxo
o ne fa fâ de cose a moddo sêu...
Sciâ se divaghe, signoa... e doppo tûtto...
– N'é vëo che staggo ben, vestia da lûtto?!