Bolle de savon/Pe-o monumento a Mameli

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
Pe-o monumento a Mameli
www.liberliber.it 2011
[p. 17 modifica]
Pe-o monumento a Mameli

Mëgio tardi che mai! - Trovae 'n scöpello
che anima e vitta a-o marmo o sacce dâ;
o ne fasse Goffredo, e o segge quello:
rigido comme a lamma d'ûnn-a spâ.

Da-o verso cûrto, asbriôu, cö ritornello,
o scûltô o deve poeîne indovinâ
tûtto o chêu, tûtto o fêugo do çervello....
O marmo o deve quaexi palpitâ.

Zena a no vêu ûn Mameli, ûn monumento
di soliti, ûnn-a cösa de manëa:
prïa freida senza cô de sentimento.

A vêu c'o parle, - a vêu veddilo, insomma,
illûminôu dä lûxe dell'Idea
pe-a quae o l'é morto combattendo a Romma.