Bolle de savon/O Prestito da Paxe

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
O Prestito da Paxe
[p. 177 modifica]
O Prestito da Paxe

Zeneixi! ghe vêu torna de palanche....
Fêua dunque o portafêuggio: - zà, son çerto
che quelli che no dan, en mosche gianche:
a Zena, no se predica a-o deserto. -

A nazion a l'é comme ûn bastimento
attressôu: - gh'ê o nostrommo, gh'é i majnae;
ma o capitanio, se ghe manca o vento,
o lappa in mëzo a-o mâ pe de giornae.

A-o capitanio.... Voeivo dî a-o governo
che da barca do stato o l'é a-o timon,
ghe vêu a monaea; base, puntello e perno,
sangue, pöso e risorsa da Nazion.

V'aspëto ä Cascia: e no me dî: - ciù tardi!...
Ma a chi parlo?... nisciûn se fä stiagnâ:
co-i södi e i franchi e i scûi se fà i miliardi:
ommi de Banchi, a voî l'ho da insegnâ?

Pe-o coraggio, o valore e l'ardimento,
pe-o gran chêu do sordatto e do majnâ,
a Trieste ghe semmo e semmo a Trento,
son nostre e nostre taere e o nostro mâ.

[p. 178 modifica]



E ûn çê chi pä che rïe dintorno o spande
fasci de lûxe: - a l'é lûxe de gloria:
l'Italia a l'é ciù bella, a l'é ciù grande
e in man a l'ha a coronn-a da Vittoria.

Ma chi a so tempo vêu sciaccâ e nissêue
o no deve sta lì co-e moen in man:
îsa!... sotto!... ûnn-a man demmo in te rêue
perchè l'Italia a posse andâ lontan:

perchè l'Italia a torne cöse a l'ëa:
a parens frugum, saeiva a dî o granâ,
e segge in tûtto o mondo a sò bandëa,
gloriosa in guaera, in paxe rispettâ.