Bolle de savon/Mazzo

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
Mazzo
[p. 93 modifica]
Mazzo

Chi dixe mazzo, dixe primmaveja,
chi dixe mazzo, dixe zoventù:
ïsae, zoenotti, a-o vostro gosso a veja,
presto o sangue o ven laete cö prezù,
presto s'ammorta o lûmme e... bonn-a seja,
passa o bon tempo e o no ritorna ciù:
o no ritorna ciù, se perde a lite,
poeì fâ e bregâ, son tûtte messe dite.

Mazzo o l'é tûtto ûnn-a canson d'amô;
canta o mâ, canta l'aegua do rianello:
pe tûtte e belle, mazzo o l'ha ûnn-a sciô,
pe tûtte e belle, mazzo o l'ha ûn strûnello,
pe tûtte e case o l'ha ûn raggio de sô;
ramme e fêugge pe-o nïo che fa ogni oxello:
mazzo o l'asciamma o sangue: - a-o roscignêu
pä che de mazzo se deslengue o chêu.

Zoenotti, no lasciae che passe l'öa,
no lasciae, figge cäe, passâ a stagion:
se o no s'acchêugge, o frûto o va in malöa;
secca a rêuza, no resta che o spinon:

[p. 94 modifica]

mazzo o l'é o meize, figge, da demöa,
e o mette addosso quella smangiaxon
- me spiego? - ch'a finisce co i majezzi....
Beneito segge mazzo e i so strionezzi!