Bolle de savon/Incognita e indovinello

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
Incognita e indovinello
[p. 95 modifica]
Incognita e indovinello

Ûn ätro anno in sciö zembo!
Ma l'ommo stando a töa,
l'anima o se resciöa
sensa pensâ a-o doman.

Doman, o l'é l'incognita,
e o l'é l'indovinello:
o in çê comme ûn öxello,
o verme in to pätan.

L'é sciollo chi se crûzia
apprêuvo a sta sciaradda:
l'é mëgio fa a so stradda
senza affannâse o chêu.

Ûnn-a bottiggia bonn-a,
ûn bon sigàro e o gotto
son comme ûn terno a-o lotto....
gödimmosela anchêu!

L'é vëo che sta bottiggia
a costa çinque lïe...
ma se a me fà ûn pö rïe,
a no l'é troppo cä.

[p. 96 modifica]

Ecco, a me dà l'aväo,
ecco, a me dà l'asbrio;
me torna o barbacïo....
poi, sä quello che sä.

Camê, pòrtine ûnn'ätra,
e a segge comme a primma;
se a me fà fâ ûnn-a rimma
cö dïo mi tocco o çê.

L'é tûtto cô de rêuza
o mondo, e o me demöa:
mi in te sto quarto d'öa
ho in bocca dell'amê.

Veuggio porze o mae gotto
a-o ricco e a-o proletajo,
e incomensâ o lûnajo
strenzendo a tûtti a man.

Mëzanêutte!... tocchemmo!
mandando ûn bello evviva!...
....ma zà vaddo ä deriva
e pe ûn sentê straman....

Zà veddo storbio e doggio....
comme l'é neigro o mondo!...
andemmo tûtti a fondo
do... do... do.... ma.... doman!...