Berio m.r. II 1.6/Devotissima oracion
| ←Lode sacre | Berio m.r. II 1.6 Devotissima oracion |
De lo complimento de lo mondo→ |
| azonto in pitin de pontezatua, maiuscole e diacrittichi (a. aguçço = voc. curta, a. çirconf. = voc. longa, ö = œu), in corscivo e ligatue (G. Musso). |
In quello tempo che Christe inluminà lo to cör, per contricion tu dei prende tempo continue i corporai extensioni e spessa vota te dei inchinar in terra in zenogion. Et quando lo inimigo de la humana generacion lo quar si è pin de iniquitai e de ingani et ello te dage batagia ocupando lo to cör in marvaxe cogitacioin, lantora tu dei continuamenti exercitarte in santissime oracioin e quando da ti serà partio lo fazo inimigo ello restarà cum grande confussion. Pensa diligentementi che merito te vereiva a compir la soa intencion, certamenti tu troverai che non è atra remuneracion salvo eterna damnacion, per che noi demo veder che per lo to sarvamento tu si troverai pu grande seguritai a combater contra allo demonio e alle soe aversitae sarvo che ti iorno e nöte te dei butar in terra in zenogion davanti allo crucifixo de Ihesu Christe cum le main levae in cielo in segno de grande dolor per le aversitae che tu ai in lo to cör e per le peccae e iniquitae che tu ai faito, e per questo ne receverai merito e gracia vogiando star in grande afflicion, chè per ti Christe glorioxo si a vosuo morir sun lo legno de la croxe si crudelmenti, per la soa gran bontae, perzochè tu eri in possanza de lo demonio zitao, per liberarte da ello. E per questa caxon tu dei semper pianzer davanti allo crucifixo pensando che Christe ello si a soferto tanti tormenti son la croxe per salvarte, siché pensa de far cossa chi gi sia in piaxei de Christe, e fazando cossì tu troverai vita eterna. O misero, o misera, se iorno e nöte te metessi in studiar le cosse le quai dixen le sante Scriture ni de cossa chi te sea incontraria e la toa consciencia non ne feise cura sapi veraxementi che lo lume de la luxe in ti aparirà, la quar te aluminerà claramenti, si che la toa bontae se i resplenderà in tar mainera che piascum la cognoserà e pöa le toe opere seran ihaire como fontana chi la soa doceza non cambia mai e como lo paraixo, lo quar si è ihairo e fiorio. Et inperzò te priego caramenti, considera quanto ben e quanto honor pervene a quella persona chi veramenti ello si se sforze a venzer li ingani e li vicij de lo fazo inimigo. Fa adonca che continuamenti tu stagi in oracion in zenogion devotamenti cum le main levae in cel davanti a Christe senza nisun deffeto et continuamenti goarda in la croxe la figura de Christe e lantora meti tuto lo to pensamento in Dee, in adorarlo de bon cör neto, e tanto quanto ti adorerai continuamenti sforzate de pianzer e sapi certamenti che in quella ora subitamenti partirà da lo tor cör una fontana de grande doceza chi te deslenguerà tute le membre de la persona in grande allegreza. E quando tu averai faito la toa oracion vergognoxamenti per le toe peccae cum la testa inchinâ in terra in segno de grande humilitae, lantora sapi certamenti che in quella hora Ihesu Christe averà pietae e misericordia de ti e lantora le toe cogitacioin monto se humilieran, in tar mainera che tu non porrai far nisunna inchinacion ni meterte in zenogion per la gran vögia e allegreza che tu averai in lo to cör, quando sentirai che in lo to cör serà remission e misericordia de le toe peccae. Per che goarda diligentementi zo che se leze in lo Evangerio, zoè che se ti non lavorerai diligentementi, non troverai quello che ti cerchi, e quando tu farai opere bone e veierai in oracion constantementi e alla porta ihamerai, lantora sapi che subito tu serai exaudio e averai la gloria de Ihesu Christe, la quar è semper averta e quelle persone chi fan li söi comandamenti in perseverar in bone opere, si che pensa de oservar quello che in lo Evangerio e in la santa Scriptura se dixe, per che in questo goarda e pensa de abandonar le cosse mondane e de meter lo to cör tuto in Christe. Ma queli chi aman tropo lo mondo de vanitae mai no porran compir la voluntai de lo nostro Segnor ni menar la soa vita veramenti, per che tuta fiâ cade in peccato e semper si se alegranlargan da la gracia de Christe. Per che qui vö vegnir alla misericordia de Dee fa mester che se parte da questo misero mondo, zoè abandonar le cosse vanne e far cossa chi sea in piaxei de Christe, zoè in ogni cossa esser semper in honestae e castitae, e fazando cossì senper averà la gracia de lo nostro Segnor, lo quar semper serà in ello per aiutarlo e sostegnerlo incontra le aversitae e ingani de lo demonio se da lo mondo o de le vanitai se asterrà de tute le cosse corporai overo carnar e lassar le vanitai e le malicie, perzochè a pensar spessa fiâ le persone cazen e meten la anima in perdicion o alchune intencioin cordiai o vanitai non refreina, per che alla gracia de Dee non porrà aprosimarse per nisun modo, che segondo che ihairamenti ne mostra la santa Scriptura, che doe cosse contrarie continuamenti non pon abitar insieme de peccao et de gracia, li quai de lo tuto son contrarij, zoè l'un de sarvacion e l'altro de danacion, per che fa mester che da tute le cosse contrarie te debi allegrar[sic] e d'exercitarse in le cosse sovradicte, zoè in perseverar in bone opere, azoché ti possi pervegnir alla gracia de lo nostro Segnor. E guarda alli apostori de Christe, li quai semper dexiravan de partisse da le cosse vanne de questo misero mondo e far li comandamenti de Christe e seguir le bone cosse, azochè fossen apreso a Ihesu Christe, e inperzò an perseverao in ogni ben e in cielo e sun cum Ihesu Christe, si che fazando ben semper troverai apareihâ la gracia de Dee e lo gran ben lo quar lo nostro Segnor si a semper aparegiao per li söi beai servioi. Or beâ quella persona la qual semper starà fervente e costante in far cossa chi sea in piaxei a Christe per aquistar lo regno de vita eterna, per che in far ben non te stanchar, azochè dapöa non cazessi in peccao, chè tuto lo ben che tu avessi faito avanti, tuto sereiva perduo, perzochè lo demonio si è tanto astuto e inzegnoxo in malicia che lengeramenti te porrea far cazer in um picen peccao, per che non porrea esser si picen che non te levasse la cognosenza e lo apetito de ben far, azochè te poesse far peccar per menarte a perdicion. Per che adonca sta continuamenti in oracion e senper cum bona intencion dentro in lo to cör, azochè lo demonio non te meta in desension, donca sta ferventementi e persevera in zazunar in contricion e in confession e in satisfacion e in lemoxine e in castitai e in caritae e dileccion e in tute bone sante opere, e fazando cossì troverai che la gracia de Christe serà tosto in ti e lantora Christe si te comfermerà in la soa gracia e si te darà la soa benession compiamenti de ogni ben temporar e spiritual in grande abondancia, per che te porrai salvar e averai lo paraixo eternal a star cum Ihesu Christe. Per che in ben far mai non te stanchar, azochè tu possi vegnî allo regno de lo cel, lo qual si è semper aparegiao a piascuna persona chi opera faza chi sea in piaximento de Yhesu Christe che nisuna persona non ne poreiva tanto dir ni mai ögij tanto non poreivan veder ni oregie odir ni cör human non poreiva tanto pensar lo gran ben e la grande gloria e honor li quai son aparegiai per tuti quelli li quai averan seguyo la via de Dê e obedir li söi comandamenti e per questa caxon aquisteran la gloria de lo nostro Segnor, lo quar mai no averà fin. Per la qual cossa regraciamo Christe omnipotente, lo quar sea semper beneito in secula seculorum. Amen.