A critica do carlevâ

A critica do carlevâ

Zena, Stampaja Façiœua
Exemprâ conservao inta Libraja Naçionâ de França
Transcriçion dipromattica.

A CRITICA

DO CARLEVÂ

---

ZENA
Stampaja Faziola
(con permis.)

CANZON.

Eîve chì a stagion di matti
Che rinêuva o Carlevâ;
Veûggio daghe i so recatti,
Veûggio daghe da studiâ.4

Cattainetta Tommaxinna
N’è cîu tempo de dormì,
In scîa festa o Scîo Reginna
O v’aspæta a divertì.8

Rosinetta, Majolin
Appaeggiæve ben vestíe
Che con voî s’aviâ da riè
In scîa festa di amandoin.12

Tëxinotto, Angelicchinna
O Ciccietta in saracchetta
In scîa festa da musetta
O v’invîa pe a Lisciandrinna.16

No pensè, che da vinassa
N’eî da beive a battaggion,
Gh’è o boggiêu con drento a cassa,
Poeì servive a discrezion.20

A trippetta ve l’impieí
De berodi, de frisciëu,
Coi malemmi ve godieì,
Ma lascieî patì i figgiêu.24

I figgiêu povei figgiêu
Che cianzian se n’han de pan;
E pe lò se n’eî de coêu
Ah sbraggian scinna doman!28

Che se vagghe in te Cantinne
A imbriaghase de bon vin;
Che s’assazzan tutte e tinne,
Che se fasse o San Martin;32

Ma e famiggie meschinette,
Che no san comme mangià,
Che vorrievan de trenette...
Che se lascian pu scigoà.36

Che se spande, che se spende,
Che s’impegne quanto s’ha,
A l’è cosa chi s’intende,
A l’è cosa chi se sà.40

Che se vende o canapè,
A strapponta da dormî,
A coverta con l’oeggiè,
Ma se vagghe a divertî.44

Belle cose, é gente cae,
Gente matte da ligà!
Mi mangiè cîuttosto rae,
Che lasciale pennezzà.48

Chi vedesse i muggi d’öu
Che s’asgreia pe o ballâ
Ah! veddieiva un gran tesöu
Ben difiçile a spiegâ.52

Oh che Dïao de Carlevâ
Cîu ghe penso, o l’è a rovinna
De famiggie, e o l’assascinna
Chi no o pêu, ma pu l’êu fâ.56

Per exempio, chi n’hà un c...no
Come mì, che son despeôu,
Gh’abbeséugna däse attorno
Pe no stäsene retioû.60

So se spende mezo scüo
Co l’hà guagno in ta giornâ,
Ah! doman sentiemo un lüo,
E o sentiemo giastemmâ.64

Ma a sto moddo, amixi cai
No a porriemo a lungo duâ;
Tutti faemo di lunaj
Pe no saise^[1] onde vortâ.68

Scicché dunque restrinzemmo
L’argomento ch’hò pe e möen;
E d’accordio se mettemmo
Pe fâ quello che conven.72

A sto mondo gh’eû giudizio
Pe no perde e scarpe in pè
Pe n’arvise o preçipizio
Sotto i êuggi, e andà inderrè.76

M’intendeî fradelli, artisti,
Gente dæta ai zeughi ai spazj?
Se de strasse seî provvisti
D’ogni vizio mai seî sazj.80

Fassan dunque o Carlevâ
Tutti i ricchi a so piaxeî,
Ma a voî atri in mæ davveî
Ve tornià lascialo andâ.84

Aoa parlo co-e Scignoe
E ghe fasso un bell’invîo,
Pâ che burle, e che demoe,
Ma sentieî cos’hò imbrunïo.88

Scîa Manin, Scîa Pölinetta
Scîa s’appaeggian pe o Feston,
Scîa se portan a servetta
Chi ghe fasse da lampion.92

Scîa veddian di lummi a sguasso
In ta sala, in ti salotti,
E se sbaglio mi no fasso
Ghe son mille e cîu seriotti.96

Scîa veddian di belli assesti
De damaschi a tutti coî,
Giani, cremexi, celesti
Festonetti, e belle scioî.100

Scîa sentian d’intanto intanto
E cîu belle scinfonie
D’un violin, che co-e so dîe
O ghe fâ come un’incanto.104

Scîa godîan de tutti i balli
Che se posse immaginâ,
Scîa veddian di belli scialli
Che Pariggi o sà inventâ108

Scîa incontrian de mascherinne
A brassetto co-i cispetti
Con de droghe de marscinne
Faete apposta pe i veggetti.112

Scîa sentian di rompi feste
Daghe a berta, e o strappontin;
Convegniâ Scîa seggian leste
A sbignasea cian ciannin;116

Perché dunque a le següa
Che o discorso s’o s’attacca,
E se mettan man ä stacca,
Scîà ghe fän brutta figuûa.120

Poi de lì passiemo ao Teatro,
Fæmo o resto do Carlin;
S’attroviemo quarc’un atro
Se n’andiemo ao butteghin.124

Poi de lì s’andiâ da o coêugo
Pe pollastri, e intingoletti
Faemo presto mette ao fêugo
Tre dozzenne d'oxelletti.128

Chi paghiâ? Ghe sâ i messè.
Chi mangiâ? Chi avià bon dente.
Chi guagniâ? Cîu d’un Camè,
Chi godiâ? Chi sà cîu ärente.132

Fæmmo punto, che son röco
Stæme attenti in scîo finî,
Che m’arresta ben cîu poco
Chi d’azzonze, e ancon da dì.136

Questi giorni d’invexendo
De sussuro, e libertæ
Coscì mâ se van spendendo
Che a pensaghe fan pietæ.140

D’ogni nêutte se fà giorno,
D ogni giorno se fà nêutte,
Se ne fà de tutte e coêutte,
E stà sempre asseiso o forno.144

Pe demoase no ghe scusa
Chi trattegne mai nisciun
No se stanca, né ricusa
A cartella a quarchedun.148

Seggie freido, seggie vento
Seggie neive, o seggian troin',
Chì se dá ao divertimanto
Gh’accompagna i boin boccoin.152

No gh’é peigo che a Scignöetta
A se piggie o raffreiddô;
No gh’è peigo che a tossetta
Se gh’addescie, o quarche dô.156

A stà ben, a mangia, a beive,
No gh’é ninte chi a tormente,
A l’é in graddo de riçeive
Quarche vixita frequente.160

Ma aspetæ che comparisce
Do zazun l’annunzio appenna,
Questo chi o l’infastidisce
O ghe sveggia un dô in ta schenna164

Patiretti, convurscioin......
Fito, fito un mego dotto
Preparæghe un bon decotto,
E di broddi di cîu boin.168

Ca no mangie mai de magro
Perchè dunque a ven secchetta
A parrîa un-na salacchetta
A parrîa un limon tutt’agro.172

Se ghe digghe ca no sciorte
Ni de nêutte, ni de giorno,
Ma ca l’aggie sempre attorno
O cispetto, o guarda porte.176

Fasse a Quœsima d’in letto
Ca n’è in caxo de sciortî,
A se sente un doloretto
Chi no a lascia mai dormî.180

A n’hà vêuggia de mangiá
A l’hà a lengua brutta, e gianca
A s’attrêuva tutta stanca
D’aveî fæto, o Carlevá.184

No gh’è spazio, nì piaxeî
Ca no s’aggie ben godîo,
Aoa a cianze, ma no o seî?
Perchè o spazio o l’è finîo.188

Ah! v’intendo, e ve conoscio
Donne belle, donne brutte,
Perdonæme se ve froscio,
Ma ve diô seî finze tutte.192

A nint’atro no seî bonne
Che a saziave d’ambizion,
E cacciá da mascarsonne
I vostri ommi in perdizion.196

Divertive, tripudiœ,
Dœve ao mondo, ä libertæ;
Fæ quant’atre inquitæ
A sto mondo fá possæ.200

Ma vegnià o castiga matti,
Cicchettinna co-a Messûja,
E veddieî che boin recatti
A ve dá co-a so spassûja.204

FIN.

1. beliscima forma contræta de saveise (G. Musso)