Çittara zeneize/Rimme servî/Per fâme ben vorei, per fâme caro
| ←Çento votte ro dì mœuro e renascio | Çittara zeneize - Rimme servî de Per fâme ben vorei, per fâme caro |
Strenzime, Amô, che vaggo in taggiarin→ |
| Zena, Franchello, 1745 notte do Prien |
VIII.
Per fâme ben vorei, per fâme caro
A questa Coppa d’oro de Zaniña,
Me crao che in peççi comme ra tonniña
Me lascerǽ redue, l’averǽ caro.
No m’avereiva in breiga ni descaro
Beive per doçe l’ægua dra mariña;
Piggerǽ per siroppo de cantiña
L’aloæ’, quand’o foisse assǽ ciù amaro.
Corrirǽ dent’re spiñe a pê descaçi:
Me caccerǽ int’ro fœugo bello nuo:
Farǽ, se poesse, zuramenti fâçi:
Piggerǽ patto a vive nuo e cruo,
Pù che a no me vózesse lê ri câçi
Questa cara Zaniña de velluo.