Çittara zeneize/Rimme de diversi a ro Cavallo e risposte de esso/Se ben, trattando ro mestê dra Guerra

←Do Cavallo a-o Ciabrea

Çittara zeneize - Rimme de diversci a-o Cavallo e risposte de esso Do Cavallo a-o Giustignan e Risposta

Do Zoagi e Risposta→

Zena, Franchello, 1745
notte do Prien

Del Cavalli Al Sig. Pier-Giuseppe Giustiniani. Se ben, trattando ro mestê dra Guerra, Vivo dent're faccende sotterrao,[1] Signor Piero Gioxeppe, e son forçao A lasciâ andâ re vixite per terra, Voî, tra quenti Patroin m’agge a ra terra, Così ben porto dent’ro cœu stampao, Che, se ben largo, ve son sempre a lao, Pronto a servîve in cappa e simiterra. Per fâve donca vei che ve son scciavo, Che vivo, int’ro daffâ torna a derrui, Poeta, finchè scciatte ro Diavo, Ve mando in un papê mille sarúi, Reservandome a bocca a fâ dro bravo Con Sonetti, chi voæran dexe scui.

Del Signor Pier-Giuseppe Giustiniani al Cavalli. Un’affetto, che dentro me fa guerra, Così me ten ro cœu assequeirao, Che me pascio de tœuscego; e biao Mi, se andasse in doî giorni sotteterra! Con tutto questo, se ro cantâ n’erra,[2] Son da ri vostri versi affoeiturao, Son de lô invriægo; e no me crao, Che ghe sæ un paro vostro in Çê ò in terra. Dîme, che ve ne prego, come fâvo A fâ Sonetti da ro Çê vegnui? Quando ri componei, cose pensâvo? Cavallo, mi a ri vostri neigri sui, Che son ri inciostri, ra mæ Muza lavo. Chi no v’ammira, è amigo da stranui.

1. Era Cancelliere al Magistrato di Guerra.
2. Se dice ancor vera la stadera del mio giudizio.