Çittara zeneize/Rimme de diversi a ro Cavallo e risposte de esso/Se Ballin piggia in man ro scigorello

←De l'Açæn e Risposta

Çittara zeneize - Rimme de diversci a-o Cavallo e risposte de esso Do Borzon e Risposta

Do Borzon e Risposta→

Zena, Franchello, 1745
notte do Prien

Del Signor Luciano Borzone Pittore al Cavalli Se Ballin piggia in man ro scigorello, Perchè Maxiña se scrolle re pruxe, Va a pecâçi ra Muxica dro Duxe, Ogni Sunao ghe perde ro çervello. Se Ballin sœunna, subito ogni oxello Per vœuggia de sentîro se descuxe: Ogni pescio intre l’ægua pâ che bruxe; Deven ro lovo un mansueto agnello. Ma aora, per fâ cose ciù stupende, Canta a ro Castellaçço uña cançon, Caro Ballin, e levane da spende. Perchè inteizo ri sassi ro tò son, Faran a Zena muragge ciù grende E ciù boñe de quelle d’Anfion.

Del Cavalli Al sig. Luciano Borzone Pittore. Se Borzon dà de man a ro pennello, Per dâ comme a ra stampa e mette in luxe Schiççi ò designi, ò d’ombra chi straluxe, Ò de corpo chi spicche a ro livello: L’œuggio in accopiâne ro modello Ghe resta lì de statua, e se ghe cuxe; E, scandaggiao ro verso dra sò luxe, O ri giudica intaggi de scópello. Son de parei, che chi vóresse attende Con muragge a postiçço de carton A ro Ducca uña ciappora a bon rende, Chi re fesse depenze da Borzon, Senç’atro o se trarreiva da contende, Con giudicâre a botta de cannon.