Çittara zeneize/Rimme çivî/Amô, quando seguì ro tò camin
| ←Siscianta luñe a cavo de çinqu’anni | Çittara zeneize - Rimme çivî de Amô, quando seguì ro tò camin |
Anima mǽ, no me movei ciù guerra→ |
| Zena, Franchello, 1745 notte do Prien |
XXXVII.
Amô, quando seguì ro tò camin,
Un grosso errô piggei de settemaña.
M’imbarchei sciù uña scorça de bazaña,
Fei fœura de gramatica un latin.
Ti hæ sempre sciù ra côa ro venin:
Ti ê fæto apointo comme ra campaña,
Chi ciamma ri atri, e lê no se destaña
Moǽ da quello beneito campanin.
No veggio ò dormo chi me faççe pro:
No sò cose sæ gusto de mangiâ;
E sempre in ære son tra sì e no.
Spendo e spando ro cœu con ra corâ:
Se imborso, imborso sempre ro mâ pro:
Così resto ciù pointo che un stivâ.