Ra cittara zeneize 1636/Treppo sciù ra chiazza
| ←torna a l'èndexo | Ra cittara zeneize de Amoî mainæschi |
Invio a ri scuoeggi→ |
| Zena, Gioxeppe Pavon, 1636 |
Canson II.
1.
Ra mæ Bella amoroza com'un Zin
Quando per dá ra stazza
A ro fresco dra chiazza
L'è con ri atre assettá sciù l'arenin
Per fá dro bell'humó sciu mi assie
Veggo che in accostame
A comensa à squadráme
Che segnando à re atre à se ne rie
Com'à dí oura fasso in sciù ro mé
Belle, deghe à Balin, che l'è chi lé.
2.
Così tosto ch'à vé l'occasion
De fá ra só fassuoéra
Da lesta à l'esce fuóera
Bellamente à me mette à ro landon
Figgie à dixe l'è chì l'appassionou
Miræ che chiera fúta,
Ogni poco de sduta
O ve cazze à ri pé chì transgrossou
Meschin ò vuoi leværo d'angonia
O che trà chi, e un'hora lé va via
3.
Tutt'asseme con fà dell'astissá
O che à cara re gronde,
O ch'à nò me responde
Solo quarche parolla attossegá
S'à vè che nò ra cerco, ni ra frugo
Torna á cangia bandera
Con fame un pó de chiera
Tutto à fin de tornáme à mette in sugo
Pá che à puinto con l'oeggio à me sozzunze
Balin, burlo così per fate punze.
4.
In questo dí con quarche novitæ
D'arenna, ò de giærette
A me scorre, e remette
A forsa de caresse graffignæ
Se fuzzo ro cammin spesso à me taggia
Spesse votte à se chinna
Con l'ægua à me sprovinna
Per tirame ro nazo de battaggia
Oura à me fà gambetta, e se ne scappa
Per vei de fame dá dré næghe in chiappa.
5.
Visto ch'à nò ghe rescie à se tratten
De nuoevo à se m'ammiga,
Bello bello à m'intriga
Torna con quelli suoé treppi da chen
Oura à ven asbriá com'unna freccia
Con Zin, ò con patelle
Per insàme ra pelle;
O ch'à punze, ò ch'à taggia, ò ch'à me peccia;
E s'à no puoé fá atro à me graffigna
Increscioza, e ostiná chiù che ra tigna.
6.
Onde, visto à ra fin che l'è tutt'un
Ro comportáne tente
Com'un fara insolente
Me prego in quello d'essene zazun,
Sazio de vei trattame in questa forma
Tra mì tutto in confuzo,
De firaghene un fuzo
Maxinna, digho, ra mezura è corma,
L'investo per fá d'atro che da beffe
Sensa pensá ch'à sæ ni lè, ni l'effe.
7.
Intanto Amó, chi è li, chì se sganascia
Dubiando de pezo
Se ghe mette damezo
Se ben dentro chiù bello ò me ghe lascia
Che mentre ò fà tra nuoi lì dro fradello
Per attrovaghe verso
Ro forfante dro guerso
Me fà re ficche sotta ro mantello
Per mostrame lì chiæro ro retræto
D’un traditó, come l'è sempre stæto.
8.
Cançon fæta de treppi, e de beschissi
De puinte rebattue
Taxi, nó ne di chiue
Che se nò ti faræ quarche bernissi
Amó ti ro conosci, l’è can vegio
Taxi dunca, ò va via pe ro tò megio.