Ra cittara zeneize 1636/Ra me bella Zaninna
| ←torna a l'èndexo | Ra cittara zeneize de Cançoin servî |
Oh' che bella coassa de cavelli→ |
| Zena, Gioxeppe Pavon, 1636 In corscivo e ligatue. |
1.
Ra me bella Zaninna,
Se ben per atro poco à me regalla,
Quarche votta che l'è così de galla
Per stà con meigo un poco in pavarinna
Pá che così con l'oeggio,
A m'aggranne con dime cose voeggio;
Mì, che son dentro fuoego,
Che me veggo fà giusto ro me zuoego,
Ghe respondo con l'oeggio à le assiè
Fin ch'à rompe ra giassa ò le, ò mie.
2.
Così con quarche attacco,
Com'à dí de rixetti ò de sospiri,
Che Amò sempre ne mostra mille tiri
L'un l'atro mette man per dine un sacco;
Mì che son parte offeiza
Comenso per levaghe ra defeiza,
E come in frenexia,
Con ri denti serræ ghe diggo stria
Con ra bocca ben spesso bell'amara
De lansameghe in chiera e d'addentara.
3.
Lé con un poco d'arte,
Per fame dá dentr'un diná menuo,
Com'in muoeo de levame ro saruo
Tirandose à derré pá ch'à me scarte
Con re gronde caræ,
Brondorando con dí che son dre mæ;
Mi repiggio coraggio
Con dighe ch'à se piggia l'avantaggio;
Lé se scangia in coró de viorette;
Mì staggho lì á mirara, e pá che tette.
4.
Veggo che dentra stissa,
In ri atti, ch'à fà de tanto in tanto
In ogni atto à compá bella atretanto
Apuinto da fá cazzene ra stissa;
Oura ghe miro in chiera
Re ruoeze à costi com'à ra fondera,
Oura ri giasemin
Chiù freschi che nò son dentri giardin,
Chi lascian re personne stupefæte
Se sen scioi sciù ra carne, ò sciù ro læte.
5.
Miro fæta à redoggi
Ra gora apè dra quá ra neive fiocca,
Ro crestallo finissimo de Rocca
Son per muoeo de parlá tutti strofoggi
Sotta ra gora un busto
Fæto à ra lensa drito com'un fusto,
Ri loei fæti à presutti,
Che solo ch'à se muoeve treman tutti
Un corpo infin si bello, e si desteizo
Da dighe un Angieretta de Pareizo.
6.
Lé che in tanto s'accorze,
In dame un'oggiaretta cosi scarsa
Da chiù à manco c'hò l'oreggia marsa
Fasse sé só che no ra posso ascorze
Per redueme à patto,
A ro pertuzo, com'à dí dro gatto
A se ten sciú re staffe
Ni se muoeve per buffe, ni per baffe
Com'á puinto aspetando in sciù re pare
Da lesta á poco à poco che me care.
7.
Mi che son tosto à pego
Rentissimo dro tutto à abbandoname
Che ogni poco che stagghe à dechiarame
Senza dubbio nissun veggo che nego,
Con l'oeggio com'in croxe,
Dando in quarche relassio sottevoxe,
Me fasso avanti un passo
A ro tocco dra mannega, o dro brasso;
Lé se retira un mezo gallisoppo
Con rebuttame, e dì che voeggio troppo.
8.
Vistome in questo affeto
Amé con accostaseme all'oreggia,
Per bon espediente me conseggia
Che ghe dighe all'oreggia ro me peto,
Fasso Cuoe de Lion
In questo dí per dighe ra raxon,
Tutto presto m'elezo
De stamene così per no fa pezo
Lé vistome stà li com'un'incanto
A me paga à ra fin con dame un chianto.