Ra cittara zeneize 1636/Quando de secca in secca và Maxinna
| ←torna a l'èndexo | Ra cittara zeneize de Amoî Mainæschi |
Queste secche sì commode, e chianelle→ |
| Zena, Gioxeppe Pavon, 1636 In corscivo e ligatue. Gh'amanca i acenti aguççi. |
Quando de secca in secca và Maxinna
Con ro pe, com'appuinto de recuoetto,
Ghe stà lì, com'à di, bocca che voetto,
Tutta de lætepreizo ra marinna.
L'Aragosta, ro Dentexo e L'Ombrinna
Corran tutti à regatta in un pancuoetto,
Com'à ro massamorro dro bescoetto,
Affueituræ, ferij à ra tettinna.
Mà che ri pesci s’invriægan tanto,
Da sata come matti fuoe dro Ma,
Che come bestie nò san chiù che tanto;
Che maraveggia infin se n'hà dà fa,
Se Ballin, chi hà giuditio ò ta[n]to, ò quanto
No g’hà poco, ni bricca da reffà?