Ra cittara zeneize 1636/L'ammartellou Ballin

Da Wikivivàgna
Ra cittara zeneize de Gian Giacomo Cavallo
Ottave Mainæsche
Zena, Gioxeppe Pavon, 1636
[p. 241 modifica]
L'AMMARTELLOU
BALLIN
Ottave Marinaresche.


1.
Riva d'Amó donde s'addorme in páxe
Sciù l'arenin d'arinto ra Marinna,
Onde ro Cé se spegia, e compiáxe
Com'in spegio, e in medaggia crestallinna
S'oura ch'ogni Pescou reposa, e taxe
Ballin solo te tedia, e t'assassinna
Perdonna à chi n'è corpa, e scuza in parte
Lé che in ra corpa g'hà ra manco parte

2.
Così pensamentozo in sciù l'arenna
Sazio quæxi dra vitta à gambe nue
Intorava consærto dra sò penna
Ballin con re parpelle capellue;
Treppavan pe ra Chiazza à ra serenna
Re Stelle, e re giærette chiù menue,
E ra Lunna rionda tutt'attorno
Fava ra nuoette chiæra com'un giorno

[p. 242 modifica]


3.
Lé contemplando come per capparro
Quelle pompe si belle à unna à unna
Goveiva incannellou dentro tabarro
Dra sò Bella in re stelle, e dentra Lunna
Mà tosto da bislacco è da bizarro
Con no fa chiù de lò stimma nissunna
Votto à cà de Maxinna con relassi
O cangiava ro Cè con quattro sassi.

4.
Cazuppora, ò dixeiva, de Pareizo,
Onde un'Arba chiù bella arve re porte;
Onde stà sempre Amó con l'erco atteizo
Arbitro dra mæ vitta, e dra mæ morte
Se in vuoi com'in un Cè miro, à desteizo
Ra Stella tramontanna dra mæ sciorte
A che cercá s'hò chì re Stelle vere
In atro Cè re Stelle forestere?

5.
Fassan pù tra ló quelle ro só corso
Come ro Cé re ghia, e re destinna
Che mì se spero moæ nissun soccorso
Tutto quanto ro spero da Maxinna
Per questa noette, e dì son sempre in corso
Patellando ri Scuoeggi, e ra Marinna

[p. 243 modifica]

E in lè com in tre Indie sguasso, e nuo
Se ben reduto all'astrego battuo.

6.
Bella Cara, oh' s'Amó per piggiá verso
Tra nuoí lé, chi é si ricco de partij
Se resorvesse intrandoghe per terso
Che inanti à lè fuissimo un dì sentij
Che Maxinna d'un cuoé tanto traverso
Desse ri suoè descarreghi compij
E poésse dì senza cangiá carroggio
Ballin ro fæto só fin à un fenoggio.

7.
Forsi che stimolá da ra conscensa
Da ro gran desbaranso dre partie
Primma che Amó buttasse ra sentensa
Ti te condanneressi da pertié;
Ond'estinta ogni nostra deferensa
Con Paxe Generá tra tì, e mie
Se trareivan ri scuoeggi da travaggi
De sentì ri tuoé torti, e ri mé sbraggi

8.
Ma perchè l'esse tì dri mè tormenti
Tanto abbrascá, che no se puoé dì quanto
Fà che quanto à sentì ri me lamenti

[p. 244 modifica]

Ti, é pe re me pecchæ sorda atretanto;
De chi n'avven che de desfame in chienti
Con stá tì come biscia lì all'incanto
Ro fruto, è che infin cavo dro me stento
Grasso lavezzo, e magro testamento.

9.
A questo segno è, Annima mæ, reduto
Ballin, che per tì sola, è in questo ballo;
Quello Ballin dre cáre tanto instruto,
Tra ri pescoei pescou com'un Corallo,
Chi per moæ nò lassate ha resoluto
Veggiá re noette intreghe com'un gallo
Che à ro dì tanto osserva ri tuoé passi
Per leccá ro terren donde ti passi.

10.
Così con demandá fin à quest'hora
Giustitia sensa un minimo recatto
Sazio dro Mondo, e pin fin à ra gora
Destomagou ne dagho in terra un schiatto
Miro ra terra, e in vei ch'à m'addolora
Scorro ri scuoeggi solo com'un matto,
Se ben ri scoeggi onde m'ascondo, e scappo
M'odian perche con lagrime ri schiappo.

[p. 245 modifica]


11.
E tra ló giastemmando ra sò sciorte
Dixan che ra mæ muxica è villanna
E che attretanto ha dro villan ra Morte
Cuinto à nò me fà dá de settemanna
Se me lamento mì, ló sbraggian forte
Dá Campanne à martello odo ogni tanna
Ni voxe gh'è tra ló si tronca, e mozza
Chi no preghe à Ballin ro má dra sozza

12.
Chiù ò voræ dí mà visto in quell'instante
Ra Nuoette in Zinna de piggiá partio
E l'Arba tráse fuoé da ro levante
E re Stelle dro tutto andá con Dio
Per no esse visto lì si stravagante
In quella marca de pessio ferio
O partì con sospiri in bassa voxe
Chi dissan, parto, e porto ra mæ croxe.