Poexie zeneixi do Feliçe Santi/O magnæra
(Ao Sciô A. Pescio).
Ceiga dönne co-i pûgni e co’ stronello;
Berretta de coniggio e d’astracan,
O a fâda d’o cappello tiâ in sci êuggi.
Ommo da centa in vitta e da cotello;
Mëzo toscano a-i denti, o spûâ lontan,
E ûnn-a testâ de rissi e de pighêuggi.
O camminn-a in sce l’örsa e o marca o passo,
L’aja spavalda e truce d’ûn Fracassa;
O lè ûn spojôso ch’o vêu fâ o gradasso,
Ch’o strêuppia, ch’o menissa e ch’o l’ammassa.
Sciâ-i lasce stâ, sciô Pescio, i sö volûmmi,
Sciâ no se stagghe a lambiccâ o çervello
Pe fâlo derivâ da questo o quello!....
Scibben che n’hö o sö inzegno nè i sö lûmmi,
Pûre ghe-o mi chi o lè o magnæra:
O lè... o figgêu d’ûn rêuito e d ûnn-a gnæra!...