Poexie zeneixi do Feliçe Santi/Dä mûagetta da Cava
| ←L'önomastico de mæ figgia | Poexie zeneixi de Dä mûagetta da Cava |
A-o cariscimo e vëgio amigo E. R. Calvetti→ |
Dä mûagetta da Cava, in faccia a-o mâ;
A-o ciæo da lûnn-a, a o lûxî de stelle,
Mi e-a Rozetto — a chêu streito e a gôa serrâ —
Stavimo lì, attacchæ comme pattelle.
Con n’a voxinn-a dôçe e ammagonâ,
( E lagrime ghe scôavan da-e parpelle! )
Lê a me dîva: « Luigin, no stâghe andâ!...
« Credimme, câo, ti væ a lasciâghe a pelle! »
E mi ghe dîva: « No cianze, câo amô!
« A Patria a m’ha ciammôu — cöse ti vêu —
« Se mi no rispondesse, sæ ûn brûtô...
« Torniö, stanni segûa, fatte du chêu..... »
E son tornôu, co-a pelle e con l’önô.....
Ma lê..... a l’aveiva zà majo e dôi figgêu!