Piaggio M. - Poesie 1846/Prefazioîn e Reviste da Çittæ/1836
*
L'è chi torna l’Anno nêuvo,
L’è chi torna o Sciô Reginn-a
Cö so Lûnajetto nêuvo,
E co-a nêuva so dottrinn-a
Per parlâ de l'anno nêuvo,
E per fâ ûn nêuvo Reginn-a!
Comme passa i anni presto!
Son zà Vintiduî (con questo)
Che corteixi me soffrî,
E no so ciù cose dî,
Che esaurïo l’è l’argomento...
Ma però no me sgomento,
Anzi piggio ciù coraggio:
Zacchè Apollo me dà lena,
Raccontâ ve vêuggio o Viaggio
(Che ho promisso) fæto a Zena
Nell’anfibio bastimento
Senza remme e senza vento,
Mæ invenzion (comme v’ho dito),
Da mi pe atro fæto e scrito
In momento ciù plauxibile,
Cioè assae primma da terribile
Longa vixita fatale
Do Cholëra micidiale
Chi straziò senza pietæ
A sgraziâ nostra Çittæ!!...
Fûnestiscima memoja!
Do quæ n’ho tracciôu l’Istoja
In patetica Canson
Con di Versci improvvisæ
(Permetteime l’esprescion)
In sciö campo de battaggia,
Fra l'orrô, o spavento e a raggia,
Ne-o ciù forte dell’azion,
Che me pâ de vedde ancon!!!...
Ma do resto, Figgi cai,
Che brûtt’anno che l’è stæto
Impastöu d’affanni e guai,
O Sciô Trenteçinque andæto!
Memorando pe-i freqoehti
Disgûstosi avvenimenti,
D’uraghen, de maremoti,
De vulchen, de terremoti,
De dilûvii, inondazioîn,
Pæsta, incendji, distrizioîn!
Diligenze fracassæ,
Case (in festa) sprofondæ,
Morti, centi, despeazioin!
Quanti italici Talenti
Che no son ciù fra i viventi!
Quanti Genii incomparabili
Che no son ciù rimpiazzabili!
Arti, scienze, profescîon,
Tûtte han perso di Campioîn
E quant’atri avvenimenti
(Da noî lunxi graziadio)
Ribûttanti s’è sentio! ...
Guære civiche brûtali,
Tramme, inscidie, tradimenti,
Odii, macchine infernali!
Gren vendette consûmmæ,
Gexe in sciamme, fûzi argenti,
Sacerdoti trûcidæ!
Portâ in trionfo l’empietæ!
Finn-a in guæra i Elementi
Co-e Stagioîn bulleversæ!
E per compimento d’opera
O flagello ascì do Chollera!!!
Basta, basta... ho dito assæ.
Discorriemmo[sic] d’allegria
E augûremmose do ben,
Che a burrasca a pâ finia:
Dunque l’Anno che aoa ven
Bisestile Trentesei
O sä ûn Anno bello assæ,
E de quelli vertadëi,
Non bastardi e stramballæ,
Co-e Stagioîn ben regolæ;
Cädo e freido a tempo e lêugo;
Ogni meize aviä o so sfêugo,
Nè restiemo ciù ingannæ!
Un Inverno freido aviemo
Co-a so fiocca e un pö de giasso,
E o feriollo se mettiemo;
Primaveja a lento passo,
Deliziosa, e bella scioïa,
Con merelli e sëxe a sgoasso,
E de tonni greminïa;
A Stæ cada e non buggïa,
Da stâ sempre in camixetta,
Ma con qualche burianetta
D’ægua, troîn, saete e gragnêua;
Un Autûnno frescosetto,
Cantiä o tordo e a parissêua,
Travaggiä sempre o sorchetto,
Quägie in grande, ûmido poi
Pe impì e tinn-e e allunghî i cöi.
Anno bello, fertiliscimo
E d’affari boîn ricchiscimo,
Da levâsene ûn pö a coæ
E negâ, drento a-i dinæ
Ne spendiemo, n’ammûggiemo,
Tanto mosci diventiemo
Che no se troviä ûn meschin,
Manco a son de campanin!
Se viviä senza anscietæ,
Se dormiä in tranquillitæ;
Tremmâ a tæra no sentiemo,
E uraghen mai non aviemo;
No vegniemo spaventæ
Da meteore fûlminanti,
Manco da ægue dilûvianti,
Nè patiemo siccitæ;
Ciù Comete no passiä
Pe mostrâne a perrûcchetta!...
E scorrî co-a spassoietta;
Giorno ä seja ciù no fä
Per caxon de quelle tali
Dite Aurore Zodiacali;
Solo a Lûnn-a e o Sô lûxiä,
E veddiemmo ancon ciû belle
Brillâ in Çê de nêutte e Stelle
Senza tanti Cannocciali;
Gren vacanze a-i Tribûnali,
Tûtte e liti in abbandon;
Meghi all'ozio, e in te Speziaje
Se contiä de mincionnaje.
Regniä sempre Amô, Concordia
Bonna-fede, Paxe, Union,
Lonxi sempre ogni Discordia;
Sposalizj a battaggion,
Contentesse senza fin,
E Battezzi ogni pittin;
Anno bello in conclûxion
Da passâ con allegria
In salûte e senza puïa
Do Sciô Chollera, chi andiä
Dove mi l’ho zà mandôu,
Nè in Italia ciù o torniä,
Che da-mondo o sä scentôu,
Che Dio vêuggie, e coscì sia.
Per passâ a malinconia
(Se gh’eì testa) stæ a sentî,
Che ve conto o mæ Viaggetto
Fæto a Zena cö sciûscetto
A-o prinçipio là d’Arvî;
Se o riûsciä ûn pittin lunghetto,
L’è perchè ve vêuggio dî
Tûtto quanto, e bello e brûtto,
Che aviö visto da per tûtto:
Et in primis, me protesto,
Me dicciaro e manifesto,
Che no parlo per livô,
Nè per fâ o Scindicatô,
Ma per pûro patrio amô
E ben pûbblico; o lezzieì,
Giando a carta, e giûdichieì;
N’ammiæ tanto per menûo,
Stæme allegri, ve salûo.
