Pe-a gran Sciortia de San Giacomo de Foxin-ne

Da Wikivivàgna
Sata a-a navegassion Sata a-a serchia
Pe-a gran Sciortia de San Giacomo de Foxin-ne
a-o 1. settembre 1833

de Martin Piaggio
Zena, stampaja Pagan, conservao presso a British Library e acescibbile da Google Books
[p. 1 modifica]
Pe-a Gran Scio[rtia]

DE SAN GIA[COMO]

de Foxinne

o giorno 1.o settembre [1833]


Comâ caa, no ve l'ho dito
Che spuntieiva o tardi o fit[o]
Da-e preteìze so Rovin-ne
A Cazassa de Foxin-ne;

Chi pensava all'incontrajo
No poeiva ese che un stond[ajo]
De Cazasse poco amante,
Anzi un'anti-cazassante;

O Proverbio o dixe ben
Che per tutti o tempo ven,
E che doppo un longo andâ
L[']ægua a và torna ao sò Mu[in.]

Ecco anchêu verificâ
Questa mascima appuntin
Ne-a Sciortia che fa o Mag[giô]

[p. 2 modifica]


Doppo tanto ch'o stà ascoso
Senza vedde a Lun-na, e o Sô
Anchêu o sciorte ciù glorioso
Con ciu pompa, e ciu decôu
Per fâ vedde ch'o l'è o Möu.

Che se i tempi son cangiæ
Sempre i mæximi l'è i Fræ,
Sempre e stesse, e Compagnie
Ne a so raxa conservæ
Con de Mutte pe-e Sciortìe.

Per convinsive de questo
Senza fâvea giudicâ
Cazassanti corrì[sic] presto
Fæ sui passi finna a Arbâ
Che veddiei un-na Sciortia
Da restâ de princisbæcche
No se fà da-o Möu filæcche
Che ogni cosa a l'è compia;
Mi no vêuggio mette stecche
Ma veddieì che procession!
Quanto sfarzo, e profuxion!

Torcie, e fiaccole a bezeffe
Lummi ä Cascìa da inorbì,[sic]

Conçertoin da fâ stordî
Vëi Portoeì che no fan beffe,

[p. 3 modifica]

E Stramoeí[sic] ancon de quelli
All'antiga con treì æffe
Che stramuan coi canestrelli.

Che lenguin! San Giacomin
Comme o fà luxî o taccan
Da mangiâselo per pan;

Pellegrin gnocchetti cai
Che son proprio da baxai,
Rætinê, canne provæ
Che son muxichi ciantæ,

Giganteschi Pastorali
Che ghe stesci un'anno a miâli,

Confalon sempre impagabile
Da un-na Banda inseparabile;

Cappe belle, Tabarrin
Con recammi a cartolin,
Preziosissimi travaggi,
Elleganza fin nei Paggi,
Da per tutto e versôu drento
Per despeto l'ou e argento;

No veddieì mai de cotton
Che e Foxin-ne l'han bandïo,
Ma veluo de sæa e razon
A treì peì, do ciù granïo.

[p. 4 modifica]


No ve parlo da bellezza
D'ogni Croxe, e da ricchezza
D'ogni Canto, nè do Cristo
Tutte cose ch'eí za visto,
Ma però con ciù e veddeì
Ve dan sempre ciù piaxeì,
Perchè tanta moscitæ
A l'allarga proprio o coêu,
E bezêugna che dighæ
Fà chi pêu, e no fà chi vêu,
Ghe veddieí de novitæ,
Che no vêuggio dîve chì
(Perchè no e sò manco mì).

Cante dunque anche vittoja
Perchè a n'hà raxon Portoja,
E che stagghe in allegrïa
Pe-a magnifica Sciortïa
Do so Möu tutto o Quartê,
Stemmo in trappa Carboné,
Miæ de fâve ben onô...
Bravi! evviva! sghêua o Maggiô...
Stupendiscima volata
Fæghe tutti un-na cioccata.

Mi no son un Otojante
Molto meno un Cazassante

[p. 5 modifica]

Manco son de quelli asbriæ
Che son pezo che i Negiæ
Che van sempre a tutti i Santi,
Ma son un de quelli tali
Vei Zeneixi non spressanti
I costummi nazionali,
E me piaxe e Cazassate
Comme a Torta e e Raviolate.

Quando sciorte un-na Cazassa
Se stà a Zena allegramente,
Da ogni canto sbucca gente,
Sciorte fêua fin-na a Lumassa,
Poi nisciun me pêu negâ
Che no circole o dinâ;

Veddeì quella chi camin-na
Co[sic] patito invexendä

Varda, varda sentï criâ
A l'é un'atra in portantin-na
Che i Camalli a fà guagnä;

Da ogni parte che ve giæ
Gh[']e i barcoin tutti piggiæ,
No veddeì che cappellin-ne
Che Ragazze invexendæ
Pe-o Galante, o pe-e Fuxin-ne.

[p. 6 modifica]

Inprinçipia a fâ dinæ
Chi appixion-na careghette
Da per tutto se ne mette
E son tante parpagiêue;

Guagna quella de nissêue
E quell'atra chi gh'hà i belli
Gianchi (e neigri) canestrelli;

Gh'ha i so buschi o Perucchê
Pe-i rissetti, pe-a tressin-na;

Guagna largo o Sciurbettê
Pe-i sciurbetti a uzo papin-na,

E Modiste, e Meistre tutte
Co-i Cuxoeì pittan de mutte,

Pe-i Candeæ e pe-i Vendivin
O l'é proprio un San Martin,

I spesiæ da dusci poi
Se ghe fan veamente eroi,

Gh'e a risorsa ascì per tanti
Narcisetti inspaximæ
Che gian comme Conquistanti
Tutte e belle da Cittæ[sic],
(Ao mandillo attenti stæ
Perchè gh'è di Dilettanti)
Gh'e a vignetta pe..... ma o resto
O taxio per fâ ciù presto.

[p. 7 modifica]


Spero ancon primma de moî
De poei vedde un giorno unie
Solo in t'un-na e træ Sciortie
Di trei Giacomi maggioî
Oh quem maximum delectum!
Omne Trinum est perfectum,
Ma lasciæmmo[sic] stâ o Latton
Vêuggio fâghe un-na Poexia
Da lasciâghe e die e o polmon,
Stæme allegri, Scignoria.

m. p.