Pe-a Sciortia de San Giacomo da Marin-na 1833

Da Wikivivàgna
Pe-a Sciortia de San Giacomo da Marin-na ne-a procescion de S. Antonio
o giorno 16 Zugno 1833

de Martin Piaggio
Zena, Stampaja Pagan, conservao presso a British Library e acescibbile insce Google Books
[p. 1 modifica]

PE-A SCIORTIA
DE SAN GIACOMO DA MARIN-NA
NE-A PROCESCION DE S. ANTONIO
O giorno 16 Zugno 1833.


CANSON.


Muse Muse, sciù addesciæve,
Dove seì, presto spicciæve
L’Arpa d’öu metteive ao collo
Che l'accorde.... ma che sciollo!
Cose vaddo a remesciâ?....
No me-a posso ciù scordâ!
Me sovven quella Canson
Che hò sentïo dex’anni son,
E chi fè tanta allegria,
Tanto sciato pe-a Çittæ
Pei Zeneixi invexendæ
Quando fè a primma Sciortia
E se fesse tanto onô
A Cazassa da Marin-na
De San Giacomo o Maggiô,
Celebrâ da-o Sciô Regin-na
Giusto in quella so Canson
Dove tutto o g’hà descrito
Con finezza, e precision.

Ah che mi l’ho sempre dito
Che da noî mai se perdiä
A semenza de Cazasse
E che presto ne sciortiä!
Che l’è ben che se ne fasse.

Son veamente un gran Profeta!
(Coscì fusse bravo Poeta!)
Che l'ho proprio indovinâ.

Cazassanti deliranti,
Dilettanti spaximanti
No ve stæ ciù a desgustâ!
Che anchêu sciorte un-na Cazassa;

Portoei bravi de lignêua,
Dove seì? .. sciortî de fêua,
Destrighæve, o tempo passa,
E imbarchæve pe-a Nunziâ
Profittando da Bonassa,
Che gustieì, bon prò ve fasse,
Un’ assazzo de Cazasse....
Cioæ, a Marin-na in miniatûa,
Perchè tutte e Compagnie,
Tutte a reo no son sciorte;

Ma stæ pe-atro d’allegria,
Che veddieì San Zaccaria,
A gran Maddre, o Venerdì
Tutte misse in punto d’öa
Con Recammi, Guanti, e Cöa,
Torcie a sguasso, e a stesse lì....

Rimarchieì da gran decenza,
Proprielæ, magnificenza,
E do sfarzo grande in tutto;

Mi me metto a indovinâ,
Perchè son zazun de tutto,
Ma no posso mai sbagliâ,
Perchè sò, che ogni Maggiô
Quando o sciorte o se fà onô,
E che o Gianco, o Grixo, e o Möu
Conservâ san o decôu
Chi conven ä so Cazassa....
Se ghe sä poi da gran seja,
Ve o diö megio questa seja.....

A l[']è là, scialla! ch’a passa....
Dæ un êuggiâ a San Giacomin
Cö takan, chi fà o spaccon
Sorve un gianco cavallon
Predicando ogni pittin,
Ammassando ogni momento,
Senza fâ cazze nisciun,
Bravo! andemmo... che talento,

[p. 2 modifica]

Miæ che belli Pellegrin!
Repassæveli a un per un
Comme son vestij de fin!
Ben montæ dä testa ai pê!
Comme cantan sempre in pin!
Son i Cigni do Quartê.

E quelli atri Rætinê,
Co-i so bravi Canestrelli,
Stæ a sentî quanti Stronelli
Van cantando ogni momento
E variando d’argomento,
Che voxin sentimentali!
In veitæ che paan pedali.

Me scordavo o Confalon
Chi fà testa ä Procescion,
Da un-na Banda preceduo,
Brava e bon-na de seguo
Che se sente da lohtan
L’armonia, cö rammaddan....

E quell’atri duî Telegrafi
Cose g’han streito pe-a man?
In argento!... due Piramidi?...
No Signor: son quelli tali
Duî stupendi Pastorali
Stæti tanto decantæ.

Miæ un pô e Cappe, e i Tabbarin
Se no son lummi ciantæ!
E quelli atri duî Paggin
In costumme spagnolesco
(Nisciun vêu patî de fresco)

Da chi a un pö capitiä o Cristo,
Tante votte o s’è zà visto
Che no sò ciù cose scrive,
Quello che mi posso dîve
Che zà o Grixo lê o no sciorte
Senza un bon Conçerto forte,
Che sta votta ne sentieì
Un in çimma e ancon de quelli
Co-i rebighi e i ritornelli
Che ve daan proprio piaxeì;

A parlâve di Portoeì
O l’è tutto tempo perso,
Son malemmi pe ogni verso!
Stæli a vedde che restieì;
Con sto cado, a cappa indosso,
E un cantâ de peiso adosso
Pä che arresan un steccon;

I Stramuoeì son rinommæ
Pè êse bravi e lesti assæ
E ciù forti che Sanson.

Quanti Lummi, e quante Scioî!
Giæve i là, dunque inorbî;
Cose diggo? anzi vortæve,
Miæla ben, e reccillæve,
Ch’a l’è a Cascia chi è portâ,
Per dî megio, fæta sghêuâ
Da Portoeì, che Vin non han
Mai adosso, e sempre Gran:
Bravi! evviva! che volata!
Fæghe presto un-na cioccata.

Oh che bella Procescion
Fà quest’anno Sant’Antonio!
Sento criâ Tizio e Sempronio,
E a Mogiê do Tavernâ......
Ghe rispondo c’han raxon,
Ma che devan ringraziâ
Quelli tali vei zelanti
E distinti Cazassanti
Che se son dæti a premûa
De levâ ai Tabari a pûa,
De fâ a-i Canti rompî a giassa
Perchè sciorte un-na Cazassa
Tanto a Zena dexideâ
Da-i Candeæ, da-i Sciurbettê,
Da-e Modiste, e i Perucchê
Per fâ giâ un pô de dinâ,
Per fâ camminâ e Person-ne
E avanzâ tante Puppon-ne;

O l’è un fruto nazionale,
Che parlando in generale,
O no porta che do ben,
Perchè tutti a dî a veitæ
Præter propter... ne stan ben
Fin-na i bravi mandillæ,
N’ho de prêuve;... ma do resto
Se per tanti o l'è indigesto,
Se a n’è tûtta Divozion
D’andâ in questa Procescion
Con sto Sô sorva e çervelle
Chi ghe scotta e carne e pelle!...
E con tanto basto adosso
Posso tiâne a conseguenza
Che gh’è un pö de Penitenza
E i assolvo in quanto posso.

m. p.