Pagina:Ricci176.djvu/73

Da Wikivivàgna


E ro Cé, per mostrá quant'o gradisce
L'innocenza in ra terra sempre muoé,
Mentre l'herba, e ra terra o l'ingianchisce
Cruoeve in test'a zaschun ra purité.
Ma questa purité, dix'unna lengua,
Appenna a n'ha toccoù, ch'a se deslengua.

E mentr'in tanto, che ro di d'ancuoe
Nasce chì per morí con gianca barba,
Mentre ro só non bast'a uscí de fuoe,
Perchè ro di non sa partí dall'arba,
Giurian, chi non puoe fá ciù pugnetto,
Per stá a ro só, corre a ro vostro letto.


Ringratiamento a ra Signora Maria Maddalena dita Bella Marinna per unna collanna d'oro missa a ro collo a sò figgio


Lustrissima patronna, arrivo a penna
Hié[sic] seira a casa attruoevo ro figgiosso,
Ch'appointo, comm'un matto da cadenna,
Fa ro matto per casa a ciù non posso,
Che da vuoi regaloù de bella menna
O se ten bon con gioie, et oro adosso;
Ma da unna gioia, e unna Signora d'oro
O no poeiva aspetá che gioie, et oro.