Pagina:Ricci176.djvu/69

Da Wikivivàgna


E che per fave vei per gratia sò,
Quanto ri mé mattoí lé sempre apprexa,
Ch'a vorré ro Viaggio de Venexa,
Ma mi presto respondo: non se pò.

Ra caosa è questa, che l'è ancora in brutto,
Ve servirò comme l'ho misso in netto,
Puôe per sprangave chì ro mé concetto,
Se ve pa ben lasciaro, farò tutto.

A lézero così per dira s[c]cietta,
Resta in tro megio in fin ro gusto guasto,
E a mette in tora solo l'antipasto,
Puoęro l'autó dell'opera imperfetta.

Me pa che sente dime: Giurian,
Questa chì l'è ra fora dro bestento,
Donca non può tirase a compimento
Questa fabrica chì de Carignan?

Diggo ch'hei meza canna de raxon,
Ma per contr'haveressi torto assie,
Se primma de sentime un poco mie,
Tirassi contra mi ra concruxion.

Stém'a sentí Signora, mi son chì,
Pin stivoù fin all'orlo dro da fá,
Che no fass'atro muoe, che litigá,
Tanto pe ri atri, quant'ancon per mi.