Pagina:Ricci176.djvu/359

Risposta deta da ro Sig.^r N. a unna B. D. che veggandoro passá fascioù in tro feriollo con re muoen sciù ro fianco a ghe disse:
O che gran veira.

Sonetto dro Sig.^r

A dí che son gran veira havei raxon,
Che quand'insemme havemmo navegoù
Ni ciù fornio de vuoi ni ciù arboroù
O gh'era Bregantin ò Garion.

È vero che vuoi sei tá fregatton,
E così largo, e si descangavoù,
Che fé danno e Brumme d'ogni loù,
E questo pe ra troppo ciavaxon.

A questo má ne ven un atr'in croppa,
Ch'hei tante cannoné dentro dra nave
Che v'han guastoù ro portello de poppa.

Onde v'exortereiva remediave,
Ma, no sò se se truoeve tanta stoppa,
Chi sé bastante per carafattave.