 |
Questa pagina a no l'è stæta corretta. | |
Là dai monti, se ö savian,
Cai Zeneixi, ve burlian! —
Doppo l’ultimo Congresso
Di Scienziæ a Milan seguìo
De Colombo assæ ciù spesso
In Çittæ parlâ ho sentìo.
Gh’ëa fra ö numeo di Scienziæ
Di Zeneixi, di boin fræ,
Che a-a so patria de ritorno
Se son dæti un po d’attorno
Con parlâne a tempo e leugo.
Sotto a çenee gh’ëa do feugo,
Cos’han fæto? Gh’han sciusciou;
Mille zimme ö l’ha mandou!
Zimme solo?... Ghe veddiemo...
Fæti i conti ne parliemo.
Son zà quattro o çinque meixi
Dacchè l’ottimo Sovrano
Ciù che Re poæ di Zeneixi,
Generoso, giusto, umano,
Con l’esempio, con çinquanta
Mila franchi ad hoc offerti
(Cosa bella e quæxi santa!)
O v'ha reizo allegri e çerti
Da so augusta protezion.
Miæ Zeneixi che lezion!
E con questo cose fæ?
L’ho da dî? Pâ che demoæ!
Se doveiva in un momento
Vedde fæto ö monumento:
Ttti, tutti ad uña voxe
Da-a Lanterna fiña a-a Foxe
Criavan viva! benedetto
Segge l'inclito intelletto,
