 |
Questa pagina a no l'è stæta corretta. | |
Fêugge secche, che Otobre o porta via,
Arrensenîe, arrubattæ da-o vento;
Sei föscia, da stagion örmai finîa,
E speranse ë lûxinghe d’ûn momento?
I giôrni de l’amô pin de poexîa;
I palpiti d’o chêu, d’o çentimento?...
L’ombra da vanitæ ridûta in pûa.....
O fêugge incamminæ pe-a seportûa?...
« Giûsto perché ti o sacci, noiatre fêugge,
« I giôrni d’o passôu rappresentemmo.
« Ombre d’o tûtto, che o Segnô o rechêugge,
« Cangemmo forma e - döppo - ritornemmo
« A tö memöja , a-i tö cavelli grixi,
« A salûtate ancon... da vëgi amixi!...
