 |
Questa pagina a l'è stæta corretta. | |
―90―
Pip. Questo o l’é ûn trattâ da poco de bon (a Falampi, sostenendo Manin).
Nic. Lê o deve piggiâ mæ figgia... sciä l’é voscià che sciä deve piggiâ mæ soêu... e son bon a obbligâghelo, e se no basta, gh’é di tribunali.
Pip. E intanto mi son chì con sto fangotto.
Manin. Ah! chi l’avesse mai ciû dîto... sciö Pippo me son compromissa per causa so... aoa sciä me ghe pense.... mi nö lascio ciû... sciä me riabilite, sciä me rende l’onô.
Pip. Sciä Manin, sciä me molle.
SCENA XI.
Rosinn-a e detti.
Ros. Ah, sciä l’é giûsto chì, bezêugna che sciä ghe rimedie voscià.
Pip. Comme, ghe seì voì ascì?
Ros. Sciä n’ha dîto a mi e a-o Gioannin che quando se maïemo sciä ne fâ accordâ da-o sciö Manuello, aoa o sciö Manuello o no ne vêu sentî parlâ, e o l’ha mandôu via o Gioannin.
Pip. E mi cose voeì che ghe faççe?
Ros. Sciä me pigge voscià.
Pip. Ma in mæ davveì che vêgno scemmo, sciä me lascian anda, sciä me mollan... devo andâ a Zena.
