Pagina:Piaggio Poexie zeneize 1846.djvu/738

Da Wikivivàgna

Gôde[sic] a bella scinfonïa
D’ûn che cianze, l’atro crïa,
Chi pe-o pan, chi pe-o tettin,
Chi è arraggiôu, chi ha l’axillin,
O ciù grande o n’êu stûdiâ,
L’atro apprêuvo o vêa demoâ,
Unn-a a fa ûn’impertinenza,
L’atra a fa scappâ a pazienza,
Azzunzeighe Bertomê,
Qualcösetta pe-a moggê...
Ecco o stato fortûnôu
D’ûn chi seggie ben majôu;

Ah! o l’è ûn gran divertimento
O doveì tûtte e mattin
Fa o so bello testamento,
Spende ûn sacco de quattrin,
E pe cose? pe accattâ
Colazion, çenn-a, e disnâ.

E a non è ûnn-a cosa bella
O doveì d’ogni pittin
Mette man, e vêuâ a scarsella
Per vestî grendi e piccin?
Aoa a meistra co-a röbetta,
O cûxôu co-a marscinetta,
Aoa o conto do caegâ,
Aoa quello do mersâ;
A modista pe-o pissetto,
Cappellin, scialli, frexetto,
D’ogni pö manca ûnn-a braga,
Mammà dixe, e Pappà paga.
Ecco o stato fortûnôu
D’ûn chi segge ben majôu.